.jpg?w=480&auto=format%2Ccompress&fit=max)
पुढारी ऑनलाईन डेस्क : मुंबईतील तरूणीचा इन्स्टाग्रामसाठी रील करताना दरीत पडून मृत्यू झाला. ही घटना रायगड जिल्ह्यातील माणगाव तालुक्यातील कुंभे धबधबा येथे घडली. अन्वी कामदार असे या तरूणीचे नाव आहे. सोशल मीडियावर रील स्टार म्हणून तिने स्वत:ची ओळख निर्माण केली होती. पाहूया कोण आहे अन्वी कामदार. (Aanvi Kamdar)
रील स्टार अशी ओळख असलेली अन्वी कामदार आणि तिचे सात सहकारी मंगळवारी (दि.१४) रायगड जिल्ह्यातील माणगाव तालुक्यातील कुंभे येथे वर्षा पर्यटनासाठी गेले होते. यावेळी ती सोशल मीडिया प्लॅटफार्म इन्टाग्रामवर शेअर करण्यासाठी एका कठड्यावर उभारून व्हिडिओ बनवत होती. यावेळी ती कठड्यावरून तोल गेल्यामुळे अंदाजे ३०० फूट दरीत कोसळली. या घटनेची माहिती अन्वीच्या सहकाऱ्यांनी माणगाव पोलीस ठाण्यात कळवली. ही माहिती समजताच माणगाव पोलीस ठाण्याचे वरिष्ठ पोलीस निरीक्षक निवृत्ती बोराडे यांनी त्वरित घटनास्थळी धाव घेत त्यांनी स्थानिक बचाव पथकांना पाचारण केले. (Influencer aanvi kamdar)
अन्वी अंदाजे ३०० फूट खोल दरीत कोसळली होती. घटनेनंतर घटनास्थळी कोलाड, माणगाव, महाड येथून प्रशिक्षित बचाव पथकांना पाचारण करण्यात आले. मात्र दरी खोल असल्याने बचावकार्यात अडचणी येत होत्या. दोरीचा आधार घेत ही बचाव पथके दरीत उतरली. यावेळी अन्वी गंभीर जखमी अवस्थेत बचाव पथकाली दिसली. यावेळी बचाव पथकांनी तिला स्ट्रेचरच्या साह्याने दोरीचा आधार घेत तिला दरीतून बाहेर काढले. तब्बल ६ तास चाललेल्या बचाव मोहिमेनंतर अन्वीचा मृतदेह बाहेर काढण्यात आला. मात्र, माणगाव येथील उपजिल्हा रुग्णालयात नेण्यापूर्वी तिचा मृत्यू झाला होता. रुग्णालयात पोहोचल्यानंतर डॉक्टरांनी तिला मृत घोषित केले.
अन्वी कामदार ही मुंबईतील मुलंद भागातील आहे. ती २७ वर्षांची आहे. तिला प्रवासाची आवड होती आणि ती त्यावर व्हिडिओ बनवत सोशल मिडियावर शेअर करत होती. सोशल मिडियावर रिलस्टार म्हणून ओळख असलेली अन्वी कामदार ही व्यवसायाने ती सनदी लेखपाल आहे. सोशल मीडियावर रील स्टार म्हणून तिने स्वत:ची ओळख निर्माण केली होती. अन्वीने कंटेंट क्रिएटर होण्यापूर्वी सल्लागार कंपनी डेलॉइटमध्ये देखील काम केले आहे.
