School Guidelines : एका बाकावर एकच विद्यार्थी, उपस्थितीबाबत पालकांची संमती आवश्यक
मुंबई : पुढारी वृत्तसेवा;
शाळेत तीन ते चार तासांपर्यंतच शिकविले जावे. या काळात शाळेत कोणताही सांस्कृतिक कार्यक्रम, संमेलन तसेच खेळाचे आयोजन करू नये. शाळेत विलगीकरणाची सुविधा असावी. शाळेत हात धुण्यासाठी सुविधा उपलब्ध करून द्याव्यात. वर्गामध्ये एका बाकावर एक विद्यार्थी याप्रमाणे बैठक व्यवस्था असावी. विद्यार्थ्यांनी शाळेत उपस्थित राहण्यापूर्वी त्यांच्या पालकांची संमती घ्यावी. शिक्षक आणि शिक्षकेतर कर्मचार्‍यांचे 100 टक्के लसीकरण आवश्यक तसेच शाळेच्या प्रशासनाने स्थानिक आरोग्य विभागाच्या संपर्कात राहणे गरजेचे आहे, अशा मार्गदर्शक सूचना ( School Guidelines ) सोमवारी शालेय शिक्षण विभागाने एका परिपत्रकद्वारे जारी केल्या आहेत.
येत्या 1 डिसेंबरपासून राज्यात पहिलीपासून शाळा सुरू करण्यास राज्य सरकारने मान्यता दिली आहे. त्या पार्श्वभूमीवर आरोग्य विभागापाठोपाठ शालेय शिक्षण विभागाने यासंदर्भातील मार्गदर्शक सूचना जारी ( School Guidelines ) केल्या आहेत. सर्व शाळांनी या सूचनांचे काटेकोर पालन करावे, असे आवाहन शालेय शिक्षण मंत्री वर्षा गायकवाड यांनी केले आहे.
अशा आहेत मार्गदर्शक सूचना…
- संबंधित शाळेतील शिक्षक/ शिक्षकेतर कर्मचार्‍यांचे कोविड लसीकरण (दोन लसी) झालेल्यांनाच शाळा/ कार्यालयामध्ये प्रवेश देण्यात यावा.
- सर्व शिक्षक व शिक्षकेतर कर्मचार्‍यांनी कोविड-19 साठीची 48 तासापूर्वीची आरटीपीसीआर चाचणी करावी.
- विद्यार्थ्यांचे नाक व तोंड मास्कने पूर्णत: झाकलेले असले पाहिजे, याबाबत विद्यार्थ्यांना सातत्याने सांगावे.
- शाळेतील परिपाठ, स्नेह संमेलन व इतर तत्सम कार्यक्रम ज्यामुळे अधिक गर्दी होऊ शकते अथवा स्पर्श होईल अशा कार्यक्रमांच्या आयोजनावर कडक निर्बंध असेल.
- शिक्षक- पालक बैठका देखील शक्यतो ऑनलाईन घ्याव्यात. शाळेत हात धुण्यासाठी सुविधा उपलब्ध करून द्याव्यात.
- वर्गामध्ये एका बाकावर एक विद्यार्थी याप्रमाणे बैठक व्यवस्था असावी. विद्यार्थ्यांनी शाळेत उपस्थित राहण्यापूर्वी त्यांच्या पालकांची संमती आवश्यक असणार आहे.
शाळा सुरू झाल्यानंतर करावयाच्या उपाययोजना
- शाळेत व परिसरात स्वच्छता व आरोग्यदायी परिस्थिती राखावी.
- सर्व शाळा आरोग्य केंद्राशी संलग्न कराव्यात. यासाठी इच्छुक डॉक्टर पालकांची मदत घेण्यात यावी.
- जास्त विद्यार्थी असलेल्या शाळा दरदिवशी दोन सत्रांमध्ये भरविण्यात याव्यात.
- विद्यार्थी, शिक्षक व कर्मचारी यांची दररोज थर्मल स्क्रिनिंग चाचणी घेण्यात यावी.
- सद्यस्थितीत पहिली ते चौथीच्या विद्यार्थ्यांचे कोणत्याही प्रकारचे खेळ घेण्यात येऊ नयेत.
- विद्यार्थ्यांच्या सुरक्षित प्रवासासाठी वाहनचालक व मदतनीस यांचे 100 टक्के लसीकरण झालेले असावे.
- स्थानिक परिस्थितीनुसार शाळांनी आवश्यक मार्गदर्शक तत्वे, सूचना निश्चित करावीत व प्रभावी अंमलबजावणी करावी. तसेच शासनाने कोविड-19 संदर्भात वेळोवेळी दिलेल्या सूचनांचे देखील पालन करण्यात यावे, असेही या मार्गदर्शक सूचनांमध्ये नमूद करण्यात आले आहे.
हेही वाचलं का?
- omicron corona : विमान कंपन्यांनी परदेशी प्रवाशांची माहिती द्यावी : उद्धव ठाकरे
- Aaditya Thackeray : मुंबईत गेल्‍या १९ दिवसांमध्‍ये दक्षिण आफ्रिकेतून आले १ हजार प्रवासी : आदित्‍य ठाकरे
- Bitcoin : बिटकॉईनला चलनाच्या स्वरूपात परवानगी देण्याचा कोणताही प्रस्ताव नाही, अर्थमंत्री सीतारामन यांची लोकसभेत माहिती