महाराष्ट्राचे नवे राज्यपाल रमेश बैस; जाणून घ्या त्यांच्याशी संबंधित ‘या’ गोष्टी

पुढारी ऑनलाईन डेस्क : रमेश बैस यांची महाराष्ट्राचे नवे राज्यपाल म्हणून नियुक्ती झाली आहे. राष्ट्रपतींनी भगतसिंह कोश्यारी यांचा महाराष्ट्राच्या राज्यपालपदाचा राजीनामा स्वीकारला. सलग ६ वेळा खासदार आणि केंद्रीय मंत्री राहिलेले भाजप नेते रमेश बैस सध्या झारखंडचे राज्यपाल म्हणून कार्यरत आहेत. त्याआधी ते त्रिपुराचे देखील राज्यपाल राहिले आहेत.

• मोठी बातमी: कोश्यारींचा राजीनामा स्वीकारला, महाराष्ट्राला मिळाले नवीन राज्यपाल

नगरसेवक ते राज्यपाल

• रमेश बैस यांचा जन्म २ ऑगस्ट १९४७ रोजी रायपूरमध्ये (पूर्वीचा मध्य प्रदेश आणि आताचे छत्तीसगढ) झाला.
• १९७८ मध्ये ते पहिल्यांदा रायपूर महानगरपालिकेचे नगरसेवक म्हणून निवडून आले.
• १९८२ ते १९८८ या काळात त्यांनी मध्य प्रदेशचे राज्यमंत्री म्हणूनही काम केले आहे.
• १९८९ मध्ये पहिल्यांदा ते लोकसभा निवडून गेले. रायपूर मतदारसंघातून त्यांनी निवडणूक लढवली होती. त्यानंतर ते याच मतदारसंघातून ६ वेळा खासदार म्हणून निवडून गेले.
• २०१९ ते २०२१ या कालावधीत ते त्रिपुराचे राज्यपाल होते.
• २०२१ मध्ये त्यांची झारखंडचे राज्यपाल म्हणून नियुक्ती झाली होती.

केंद्रीय मंत्री म्हणूनही अनेक खाती सांभाळली

• मार्च १९९८ ते ऑक्टोबर १९९९ केंद्रीय पोलाद आणि खाण राज्यमंत्री
• ऑक्टोबर १९९९ ते सप्टेंबर २००० केंद्रीय राज्यमंत्री, रासायनिक खते
• सप्टेंबर २००० ते जानेवारी २००३ केंद्रीय राज्य, माहिती आणि प्रसारण मंत्री
• जानेवारी २००३ ते जानेवारी २००४ केंद्रीय राज्यमंत्री, खाण मंत्रालय
• जानेवारी २००४ ते मे २००४ केंद्रीय राज्यमंत्री, पर्यावरण आणि वन मंत्रालय

तीन वेळा 'झारखंड वित्त विधेयक २०२२' पाठवले माघारी

रमेश बैस यांनी झारखंड विधानसभेने पारित केलेले 'झारखंड वित्त विधेयक-2022' भारतीय संविधानाचे उल्लंघन करते या कारणास्तव तीन वेळा माघारी पाठवले होते. हिंदी आणि इंग्रजी आवृत्त्यांमधील भाषांतरातील विविध विसंगतींमुळे पहिल्यांदा विधेयक परत केले. त्यानंतर झारखंड विधानसभेत सुधारित विधेयक मंजूर न करता पुन्हा राज्य सरकारने विधेयक त्यांच्या संमतीसाठी पाठवले. पण पुन्हा बैस यांनी राज्य सरकारला सुधारित विधेयक मंजूर करून पाठवण्यास सांगितले. तर तिसऱ्यांदा ते विधेयक भारतीय संविधानाचे उल्लंघन करते या कारणास्तव परत पाठवले होते.

हेही वाचा :

• उपमुख्यमंत्री देवेंद्र फडणवीस : 'नाशिक, नगर, मराठवाडा पाण्याचा वाद मिटवणार'
• पुणे : पीएमपीच्या डबल डेकर बसचे भविष्य बोर्ड मीटिंगमध्ये ठरणार
• वकील, भावी न्यायाधीशांनी घटनात्मक मूल्यांचा अंगिकार करावा : सरन्यायाधीश चंद्रचूड