Case against ShivSena: मोदींसह अन्य नेत्यांची नक्कल केल्याप्रकरणी ठाकरे गटाच्या नेत्यांविरुद्ध गुन्हा
पुढारी ऑनलाईन: देश आणि राज्यपातळीवरील महत्त्वाच्या नेत्यांची नक्कल केल्याप्रकरणी शिवसेना उद्धव बाळासाहेब ठाकरे गटाच्या सात नेत्यांविरुद्ध गुन्हा दाखल करण्यात आला आहे. ८ ऑक्टोबरच्या ठाण्यातील सभेत पंतप्रधान नरेंद्र मोदी, मुख्यमंत्री एकनाथ शिंदे आणि केंद्रीय मंत्री नारायण राणे यांची नक्कल केल्याप्रकरणी हा गुन्हा दाखल करण्यात आला आहे, अशी माहिती ठाणे पोलिसांनी दिली.
Maharashtra | Case registered at Thane’s Naupada PS u/s 153, 500, 504 IPC against 7 leaders of ShivSena (Uddhav Balasaheb Thackeray) for mimicking PM Modi, CM Eknath Shinde & Union Minister Narayan Rane, at a rally in Thane on October 9th: Thane Police
— ANI (@ANI) October 12, 2022
ठाण्यातील सभेत शिवसेनेच्या उद्धव बाळासाहेब ठाकरे या गटातील मुख्य पदाधिकारी आणि नेत्यांवर नौपाडा पोलीस ठाण्यात हा गुन्हा दाखल करण्यात आला आहे. या नेत्यांविरूद्ध भारतीय दंड संहितेच्या (IPC) कलम १५३,५०० आणि ५०४ अंतर्गत हा गुन्हा दाखल केल्याची माहिती ठाणे पोलिसांनी दिली आहे.
ठाकरे गटातील सुषमा अंधारे, भास्कर जाधव, विनायक राऊत, केदार दिघे, राजन यांसह अनेक महत्त्वाच्या नेत्यांवर गुन्हे दाखल झाले आहेत. शिवसेना उद्धव बाळासाहेब ठाकरे यांनी रविवारी ठाण्यात काढलेल्या महाप्रबोधन यात्रेत भाषणादरम्यान या नेत्यांनी आक्षेपार्ह वक्तव्ये केली होती. या नेत्यांनी आपल्या भाषणात मुख्यमंत्री एकनाथ शिंदे, भाजपचे मोठे नेते यांच्यावर आपल्या भाषणात त्यांची नक्कल करत त्याच्यावर टिका देखील केली होती. या कारणाने शिवसेनेच्या या मुख्य नेत्यांवरच गुन्हा दाखल करण्यात आला आहे.