अंधेरी विधानसभा पोटनिवडणुकीत काँग्रेसचा शिवसेनेला पाठिंबा
मुंबई; पुढारी वृत्तसेवा : अंधेरी पूर्व विधानसभा मतदारसंघाचे शिवसेनेचे आमदार रमेश लटके यांच्या आकस्मित निधनामुळे पोटनिवडणूक लागलेली आहे. या निवडणुकीत काँग्रेस पक्ष आपला उमेदवार देणार नसून महाविकास आघाडी म्हणून शिवसेनेच्या उमेदवाराला पाठिंबा देणार आहे. अशी घोषणा महाराष्ट्र प्रदेश काँग्रेस कमिटीचे अध्यक्ष नाना पटोले यांनी आज केली आहे.
यावेळी नाना पटोले म्हणाले की, विधानसभा निवडणुकीच्या निकालानंतर जातीयवादी धर्मांत भाजपला सत्तेपासून दूर ठेवण्यासाठी आणि महाराष्ट्राच्या हितासाठी महाविकास आघाडीची स्थापना झाली होती. राज्यात अडीच वर्षे या महाविकास आघाडीचे सरकार होतं. या सरकारने शेतकरी कर्जमाफी सारखे अनेक लोकोपयोगी निर्णय घेतले. कोरोनासारख्या महाभयंकर संकटकाळात देशात सर्वोत्तम काम केले. पण सत्तापिपासू भारतीय जनता पक्षाने ईडी, सीबीआय या केंद्रीय संस्थाचा दुरुपयोग केला. शिवसेनेच्या आमदारांना फोडून महाविकास आघाडी सरकार पाडले. महाविकास आघाडी फोडण्याचे प्रयत्न भाजपने केले ते यशस्वी झाले नाहीत म्हणून त्यांनी शिवसेना पक्ष फोडला. भारतीय जनता पक्षाविरोधातील या लढाईत महाविकास आघाडी म्हणून काँग्रेस पक्ष शिवसेनेसोबत खंबीरपणे उभा आहे. त्यामुळे अंधेरी पूर्व विधानसभा पोटनिवडणुकीत काँग्रेस पक्ष आपला उमेदवार देणार नाही. शिवसेना पक्ष जो उमेदवार देईल त्याला निवडून आणण्यासाठी काँग्रेस पक्षाचे नेते आणि कार्यकर्ते पूर्ण ताकदीने काम करतील, असे पटोले म्हणाले.
काँग्रेसचे नेते अशोक चव्हाण यांनीही शिवसेनेच्या उमेदवाराला माहाविकास आघाडीचे उमेदवार म्हणून पटोले यांनी केलेली घोषणा संयुक्तिक असल्याचे म्हटले आहे. त्यांनी याबातचे ट्विट केले आहे. यामध्ये त्यांनी महाविकास आघाडीच्या उमेदवाराच्या विजयासाठी काँग्रेस पक्ष सक्रियतेने काम करेल असे म्हटले आहे.
अंंधेरी पूर्व विधानसभा मतदारसंघाच्या पोटनिवडणुकीत महाविकास आघाडीचे उमेदवार म्हणून @ShivSena उमेदवाराला समर्थन देण्याची घोषणा @INCMaharashtra चे अध्यक्ष @NANA_PATOLE यांनी केली आहे. ही घोषणा संयुक्तिक आहे. #महाविकासआघाडी उमेदवाराच्या विजयासाठी काँग्रेस पक्ष सक्रियतेने काम करेल.
— Ashok Chavan (@AshokChavanINC) October 5, 2022
हेही वाचा