Nanded Naigaon Gambling Raid
नायगाव : नायगाव तालुक्यातील सुजलेगाव शेतशिवारात सुरू असलेल्या ‘तिर्रट’ जुगार अड्ड्यावर कुंटूर पोलिसांनी छापा टाकून पाच जणांना ताब्यात घेतले. या कारवाईत रोख रक्कम, दुचाकी, मोबाईल आणि जुगाराचे साहित्य असा एकूण ३ लाख १३ हजार ७०० रुपयांचा मुद्देमाल जप्त करण्यात आला.
नांदेड जिल्ह्यातील जुगार, मटका आणि अन्य अवैध धंद्यांना आळा घालण्यासाठी पोलिस अधीक्षक डॉ. नीलाभ रोहन यांच्या मार्गदर्शनाखाली विशेष मोहीम राबविण्यात येत आहे. या मोहिमेंतर्गत ८ ऑगस्ट रोजी कुंटूर पोलिसांनी ही कारवाई केली.
कुंटूर पोलिस ठाण्याच्या प्रभारी अधिकाऱ्यांना सुजलेगाव शेतशिवारात काही जण ‘तिर्रट’ नावाचा जुगार खेळत असल्याची गोपनीय माहिती मिळाली. माहितीची खातरजमा केल्यानंतर पोलिस निरीक्षक भोसले यांच्या नेतृत्वाखाली विशेष पथकाने पंचांसमक्ष घटनास्थळी छापा टाकला. त्यावेळी संशयित जुगार खेळताना आढळून आले.
पोलिसांनी रवीराज उत्तम जुकरे (२७, रा. सुगाव, ता. देगलूर), सुनील माधवराव उच्ये (२५, रा. करे मलकापूर, ता. देगलूर), साईराज पी. रामकिशन कदम (२९), अभिषेक हंगे (२७) आणि लक्ष्मण किशनराव तरकंटे (३३), तिघेही रा. सुजलेगाव, ता. नायगाव, यांना ताब्यात घेतले.
कारवाईत २१ हजार ७०० रुपये रोख, दोन मोटारसायकली व एक बुलेट असा २ लाख २० हजार रुपयांचा वाहनसाठा, चार मोबाईल (७२ हजार रुपये) तसेच जुगाराचे साहित्य, असा एकूण ३ लाख १३ हजार ७०० रुपयांचा मुद्देमाल जप्त करण्यात आला.
या प्रकरणी कुंटूर पोलिस ठाण्यात गुन्हा क्रमांक २०३/२०२६, महाराष्ट्र जुगार प्रतिबंधक कायद्याच्या कलम १२(अ) अन्वये गुन्हा दाखल करण्यात आला असून पुढील तपास सुरू आहे.
ही कारवाई पोलिस अधीक्षक डॉ. नीलाभ रोहन यांच्या आदेशाने व सहाय्यक पोलिस निरीक्षक भोसले यांच्या मार्गदर्शनाखाली पोहेकॉ कांबळे, पवार, सप्रिल हंबर्डे तसेच कुंटूर पोलिस ठाण्यातील कर्मचाऱ्यांनी केली.
जुगार, मटका, अवैध दारू, अमली पदार्थ आणि अन्य अवैध धंद्यांविरोधात नांदेड जिल्हा पोलिसांनी कारवाईची मोहीम तीव्र केली आहे. नागरिकांनी आपल्या परिसरात अशा प्रकारचे अवैध प्रकार आढळल्यास तातडीने पोलिसांना माहिती द्यावी, असे आवाहन पोलिस प्रशासनाने केले आहे.
