Petrol Crisis: Queues of Vehicles at Pumps
जालना, पुढारी वृत्तसेवा सध्या जालना शहरासह जिल्हाभरात पेट्रोलच्या टंचाईच्या भितीने वाहनधारक गर्दी करीत आहे. गेल्या दोन दिवसापासून पेट्रोल पंपावर उन्हातान्हात गर्दी होत आहे. घरगुती गॅसच्या टंचाईसह आता पेट्रोल टंचाईने डोके वर काढले आहे. एकीकडे जिल्हा प्रशासन पेट्रोलचा पुरेसा साठा असल्याचे सांगत आहेत. तर दुसरीकडे मात्र, पेट्रोल भरण्यासाठी तुफान गर्दी होत आहे. गुरूवार, दि. २६ रोजी तर पोलिस बंदोबस्तात पेट्रोलचे वितरण करण्यात आले. दुचाकीधारकांना २०० रुपये तर तीन आणि चारचाकी वाहनांना २००० हजार रुपयापर्यंतच्या मर्यादेत पेट्रोलचे वितरण केले जात आहे. सध्या शहरासह पेट्रोल मिळविण्यासठी वाहनधारकांना मोठी कसरत कारावी लागत आहे. आणीबाणीची परिस्थिती निर्माण झाली आहे.
ालना शहरात अचानक उद्भवलेल्या पेट्रोलच्या टंचाईमुळे नागरिकांना मोठा मनस्ताप सहन करावा लागत आहे. गेल्या दोन दिवसांपासून जालना शहरातील अनेक पेट्रोल पंपांवर पेट्रोलचा पुरवठा खंडित झाल्याने वाहनधारकांची मोठी गैरसोय होत असून, पंपांवर लांबच लांब रांगा लागलेल्या दिसून येत आहेत. सकाळपासूनच पेट्रोल भरण्यासाठी नागरिकांची गर्दी उसळत असून, अनेकांना तासन्तास प्रतीक्षा करावी लागत आहे.
इंधनटंचाईमुळे शहरातील दैनंदिन जीवनावरही परिणाम झाला आहे. खासगी वाहनधारकांसह रिक्षाचालक, व्यावसायिक आणि प्रवासी यांना मोठ्या अडचणींचा सामना करावा लागत आहे. बुधवारी, दि. २५ रोजी सायंकाळी चार वाजेनंतर शहरातील बहुतांश पेट्रोल पंप बंद झाले होते. तीच परिस्थिती गुरुवार, दि. २६ रोजी देखील पाहायला मिळाली.
आपल्या दुचाकी, चारकारी गाड्यात पेट्रोल भरण्यासाठी वाहनधारकांनी सकाळपासूनच पेट्रोलपंपावर गर्दी केली होती. दुपारी तीन वाजेनंतर शहरातील तीन पेट्रोल पंप पेट्रोल संपल्याने बंद ठेवावे लागले, तर काही पंपांवर मर्यादित प्रमाणातच पेट्रोल दिले जात आहे. त्यामुळे नागरिकांमध्ये अस्वस्थता आणि नाराजीचे वातावरण निर्माण झाले आहे. इजराइल अमेरिका आणि इराण यांच्या युद्धामुळे आखाती देश धगधगत आहेत. त्यामुळे भारताकडे येणाऱ्या इंधनावर याचा विपरीत परिणाम पडत आहे.
घरपोच घरगुती गॅस ठप्प; ग्राहकांच्या रांगा
जालना : शहरात घरपोच एलपीजी गॅस वितरणाची सेवा मोठ्या प्रमाणात घटल्याने ग्राहकांना प्रचंड गैरसोयीचा सामना करावा लागत आहे. गॅस सिलिंडर वेळेवर घरपोच न मिळाल्यामुळे नागरिकांना थेट गॅस एजन्सीसमोर उन्हातान्हात तासन्तास रांगा लावाव्या लागत आहेत, गॅस बुक झाल्यानंतर ग्राहकांना गॅस एजन्सी येथे पावती दाखवल्यानंतर स्वतः गोदामातून गॅस सिलिंडर आणावे लागत आहे. शिवाय, गॅस सिलिंडर बुकिंगचा वेटिंग पीरियडही वाढल्यामुळे ग्राहकांना नाहक मनस्ताप सहन करावा लागत आहे.
पेट्रोल-डिझेल वितरणावर मर्यादा लागू
जिल्ह्यात पेट्रोल आणि डिझेलचा मुबलक साठा असल्याचा दावा प्रशासनाकडून केला जात असला, तरी प्रत्यक्षात वितरणावर नियंत्रण आणण्यासाठी पुरवठा विभागाने नवीन नियमावली जाहीर केली आहे.
या नियमानुसार, दुचाकींसाठी फक्त २०० पर्यंत पेट्रोल, तीनचाकी व चारचाकींसाठी २००० पर्यंत इंधन अशा मयदितच इंधन देण्याचे आदेश जिल्हा पुरवठा अधिकारी सविता चोथे यांनी जारी केले आहेत. अचानक वाढलेल्या मागणीमुळे आणि टंचाईच्या पार्श्वभूमीवर ही उपाययोजना करण्यात आली आहे.
गॅस संपल्याने ऑटोचालक हवालदिल
जालना : शहरातील गांधी चमन परिसरातील एलपीजी गैस पंपावर ऑटोचालकांची मोठी गर्दी उसळल्याचे चित्र पाहायला मिळाले. अचानक गॅसचा तुटवडा निर्माण झाल्याने ऑटोचालकांनी लांबच लांब रांगा लावल्या, रोजचा व्यवसाय ठप्प होण्याची भीती व्यक्त केल्या जात आहे. गॅस वेळेत न मिळाल्यास उपजीविकेवर परिणाम होणार असल्याने चालकांमध्ये चिंतेचे वातावरण निर्माण झाले आहे.
