Manoj Jarange Patil Mumbai March: मराठा आरक्षणाच्या मागणीसाठी उपोषणाला बसलेले मनोज जरांगे पाटील यांनी १५ सप्टेंबर रोजी अंतरवाली सराटी येथून मुंबईच्या दिशेने रवाना होण्याचा निर्णय घेतला आहे. उपोषणाच्या १७व्या दिवशी पत्रकार परिषदेत त्यांनी सकाळी ११ वाजता मुंबईकडे निघणार असल्याचे स्पष्ट केले. मात्र, यावेळी मोठा जमाव सोबत न घेता सुरुवातीला मोजक्या लोकांसह मुंबईकडे जाण्याची भूमिका त्यांनी घेतली आहे.
मुंबई पोलिसांनी आझाद मैदानावरील प्रस्तावित आंदोलनाला परवानगी नाकारली असली, तरी मुंबईकडे जाण्याचा आपला निर्णय बदललेला नाही, असे जरांगे यांनी स्पष्ट केले. विशेष म्हणजे, ‘मराठे येणार म्हणून परवानगी नाकारली, आता मी एकटाच येतोय; मला तरी परवानगी देणार का?’ असा थेट सवाल त्यांनी मुख्यमंत्री देवेंद्र फडणवीस यांना केला.
मुंबईच्या दिशेने रवाना होताना आपला ताफा अत्यंत छोटा असेल, अशी माहिती जरांगे यांनी दिली. सुरुवातीला जास्तीत जास्त दोन वाहने आणि दोन रुग्णवाहिका असतील. एखादे वाहन बंद पडल्यास पर्यायी व्यवस्था असावी, यासाठी हा ताफा ठेवण्यात येणार आहे. एकूण चार वाहनांपेक्षा अधिक वाहने सोबत नसतील, तर केवळ पाच ते दहा जणच आपल्या सोबत असतील, असे त्यांनी सांगितले.
मोठ्या संख्येने मुंबईकडे जाण्यासाठी मराठा समाजाने केलेली तयारी थांबवू नये, असे आवाहन जरांगे यांनी केले. गावागावातून जमा केलेली वर्गणी आणि मुंबईकडे जाण्यासाठी तयार ठेवलेल्या गाड्या सध्या तशाच ठेवाव्यात, असे त्यांनी सांगितले. आंदोलनाची गरज भासल्यास योग्य वेळी मराठा समाजाला मुंबईत बोलावण्यात येईल, अशी भूमिका त्यांनी स्पष्ट केली.
त्यामुळे सध्या मोठा जमाव मुंबईत न आणता परिस्थितीनुसार पुढील निर्णय घेण्याची रणनीती जरांगेंनी आखल्याचे दिसून येत आहे.
‘मी एकटा खिंड लढतो,’ असे म्हणत जरांगे यांनी सुरुवातीला स्वतःच मुंबईच्या मार्गातील अडथळ्यांचा सामना करण्याची भूमिका स्पष्ट केली. मुंबईकडे जाताना निर्माण होणाऱ्या अडचणी आधी आपण पार करण्याचा प्रयत्न करू, असे त्यांनी सांगितले.
‘रस्त्यातले काटे मला काढू द्या, म्हणजे ते मराठ्यांना टोचणार नाहीत,’ अशा शब्दांत त्यांनी आपली भूमिका मांडली. त्यामुळे आंदोलनाची पुढील दिशा ठरवण्यापूर्वी परिस्थितीचा अंदाज घेण्याचा प्रयत्न केला जाणार असल्याचे संकेत मिळत आहेत.
मुंबई पोलिसांनी आंदोलनाला परवानगी नाकारल्यानंतर जरांगे यांनी सरकारवर निशाणा साधला. मोठ्या संख्येने मराठा आंदोलक मुंबईत येणार असल्याचे कारण देत परवानगी नाकारली जात असेल, तर आता आपण एकट्याने येत असल्याने आपल्याला आझाद मैदानात आंदोलन करण्याची परवानगी दिली जाईल का, असा सवाल त्यांनी उपस्थित केला.
मुंबई पोलिसांनी मात्र सुरक्षा व्यवस्था, वाहतुकीवर होणारा परिणाम, सार्वजनिक गैरसोय आणि गणेशोत्सवाच्या काळातील अतिरिक्त बंदोबस्ताचा ताण यांसारखी कारणे देत परवानगी नाकारल्याचे सांगितले आहे.
जरांगे यांनी सरकारवर आणखी गंभीर आरोप केले. गणेशोत्सव आणि सणांच्या पार्श्वभूमीचा फायदा घेत मराठा आंदोलनावर दबाव निर्माण करण्याचा प्रयत्न होत असल्याचा दावा त्यांनी केला. आंदोलनादरम्यान एखादा गैरप्रकार घडल्यास त्याचा दोष मराठा समाजावर टाकला जाऊ शकतो, अशी भीतीही त्यांनी व्यक्त केली.
दरम्यान, १५ सप्टेंबरला सकाळी ११ वाजता अंतरवाली सराटीतून मुंबईकडे रवाना होण्याच्या निर्णयावर जरांगे पाटील ठाम आहेत. आता त्यांच्या या भूमिकेनंतर सरकार आणि प्रशासनाकडून काय भूमिका घेतली जाते, याकडे सर्वांचे लक्ष लागले आहे.
