वडीगोद्री : आरक्षणाबद्दल बोलत होता, तुम्ही वैचारिक विरोध करत होता, तोपर्यंत ठीक होतं. पंरतु आता तुम्ही आमच्या अस्मितेपर्यंत पोहोचला आहात, आमच्या लेकी बाळीपर्यंत तुमची नजर चालली,त्यामुळे तुम्ही कोणत्या विचाराचे माणूस आहात? हे आम्हाला कळालं आहे, असा लक्ष्मण हाके यांच्या त्या वक्तव्याचा समाचार मनोज जरांगे पाटील यांनी घेतला.
मनोज जरांगे पाटील यांनी लक्ष्मण हाके यांच्या वक्तव्याचा जोरदार समाचार घेतला आहे. मी आतापर्यंत त्याच्यावर काही बोललो नाही, तुम्हाला आतापर्यंत बोललो नाही, लक्षात ठेवा, तुमच्या लेकीबाळी मी माझ्या लेकीबाळी प्रमाणे समजतो. अजित पवारांचे दोन कार्यकर्ते धनंजय मुंडे, आणि छगन भुजबळ यांनी त्यांना हाताखाली धरलं आहे, त्यांना काही बोलता येत नाही, म्हणून ते यांच्या तोंडून त्यांची भाषा वदवून घेत आहेत. त्यांचे विचार बीड जिल्ह्यात येऊन पाजळण्याचे काम करू नका, त्या दोघांना बोलता येईना म्हणून, त्या दोघांनी तुम्हाला हाताखाली धरलं आहे. परंतू लक्ष्मण हाके यांच्या ते काही लक्षात येत नाही.
गरीब धनगर समाज बांधवांच्या हे लक्षात आलेलं आहे. म्हणून धनगर लोक त्यांना जवळ करत नाही, मी त्यांच्यावर काहीच बोललो नव्हतो, त्याला देखील हेच कारण होतं. ते म्हणजे आम्हाला माहिती आहे, की यांचे गढूळ विचार आहेत. कुणाच्याही लेकीबाळीवर आम्ही आतापर्यंत बोललेलो नाही, कारण धनगराची लेक आहे, ती आमची पण लेक आहे. धनगर बांधवांच्या हे लक्षात आलेल आहे, की हे विनाकारण भांडण विकत घेत आहेत, अशा शब्दात मनोज जरांगे पाटील यांनी लक्ष्मण हाके यांच्यावर निशाणा साधला आहे.
ओबीसी नेते लक्ष्मण हाके यांनी लग्नाबाबत वादग्रस्त वक्तव्य केलं होतं, त्यामुळे संपूर्ण मराठा समाज आक्रमक झाला आहे. लक्ष्मण हाके यांच्या या वादग्रस्त विधानाचा निषेध करण्यात येत आहे, दरम्यान यावर आता मनोज जरांगे पाटील यांची पहिली प्रतिक्रिया समोर आली आहे, त्यांनी लक्ष्मण हाके यांना इशारा देतानाच मंत्री छगन भुजबळ आणि आमदार धनंजय मुंडे यांच्यावर देखील अप्रत्यक्ष निशाणा साधला.
