Suspend the new fertilizer booking system!
छत्रपती संभाजीनगर, पुढारी वृत्तसेवा : जिल्ह्यात प्रायोगिक तत्त्वावर सुरू करण्यात आलेली 'फ्रेमवर्क फॉर फर्टिलायझर सेल' ही मोबाईल-आधारित खत बुकिंग प्रणाली शेतकरी आणि खत विक्रेत्यांसाठी डोकेदुखी ठरत आहे. या पार्श्वभूमीवर, या प्रणालीला चालू खरीप हंगाम संपेपर्यंत तात्पुरती स्थगिती द्यावी, अशी मागणी खासदार डॉ. कल्याण काळे आणि खासदार संदीपान भुमरे यांनी बुधवारी (दि. १७) केंद्रीय रसायन व खत मंत्री जे. पी. नड्डा यांच्याकडे निवेदनाद्वारे केली.
निवेदनात नमूद केल्यानुसार, ग्रामीण भागात सर्व्हर वारंवार डाऊन होणे, तांत्रिक त्रुटी निर्माण होणे आणि या डिजिटल प्रक्रियेचे पुरेशी माहिती व प्रशिक्षण नसल्याने शेतकऱ्यांना कृषी सेवा केंद्रांवर नाहक फेऱ्या माराव्या लागत आहेत. सध्या खरीप हंगामाचा अत्यंत महत्त्वाचा काळ असल्याने शेतकऱ्यांना वेळेत खते मिळणे गरजेचे आहे.
त्यामुळे या प्रणालीतील सर्व व्यावहारिक अडचणी आणि तांत्रिक दोषांचा सखोल अभ्यास करून त्यात आवश्यक सुधारणा कराव्यात, तोपर्यंत ही प्रणाली स्थगित ठेवावी, अशी मागणी खासदारांनी केली आहे. केंद्रीय मंत्री नड्डा यांनी यावर सकारात्मक निर्णय घेण्याचे आश्वासन दिले आहे.
