Drought in Marathwada; will urge the Chief Minister to hold a cabinet meeting
छत्रपती संभाजीनगर, पुढारी वृत्तसेवा : मराठवाड्यात निर्माण झालेली दुष्काळी परिस्थिती, पिकांचे नुकसान आणि शेतकऱ्यांसमोरील संकटामुळे विभागासाठी मुख्यमंत्री देवेंद्र फडणवीस हे भरीव तरतूद करतील. परंतु, या परिस्थितीवर मराठवाड्यात मंत्रिमंडळाची बैठक व्हावी, अशी अपेक्षा आहे, त्यासाठी येत्या कॅबिनेट बैठकीत आग्रह करणार असल्याचे पालकमंत्री संजय शिरसाट यांनी गुरुवारी (दि. १०) विभागीय आयुक्तालयात पत्रकारांशी संवाद साधताना सांगितले.
यावेळी विभागीय आयुक्त जी. श्रीकांत, पोलिस आयुक्त प्रवीण पवार, जिल्हाधिकारी विनय गौडा जीसी, महापालिका आयुक्त अमोल येडगे, सार्वजनिक बांधकाम विभागाचे अधीक्षक अभियंता एस. एस. भगत यांच्यासह अधिकारी उपस्थित होते. पालकमंत्री शिरसाट यांनी अधिकाऱ्यांकडून मराठवाडा मुक्तिसंग्राम दिनाच्या पार्श्वभूमीवर होणाऱ्या कार्यक्रमाच्या तयारीचा आढावा घेतला.
त्यासोबतच बैठकीत मराठवाड्यात निर्माण झालेली दुष्काळी परिस्थिती, पिकांचे नुकसान आणि शेतकऱ्यांसमोरील संकट यावरही चर्चा झाली. पावसाचा मोठा खंड वाढल्याने आहे. शेतकरी संकटात सापडला आहे. जिल्ह्यात काही ठिकाणी शेतकरी सोयाबीनचे पीक काढून फेकत आहेत.
मुक्तिसंग्राम दिनाच्या कार्यक्रमासाठी मुख्यमंत्री संभाजीनगरमध्ये येत आहे. या पार्श्वभूमीवर मराठवाड्यासाठी मंत्रिमंडळ बैठक होते. परंतु, तीन वर्षांपासून ही बैठक झालेली नाही. त्यात आता दुष्काळी स्थिती निर्माण झालेली आहे. यंदा बैठक घ्यावी, अशी मागणी यापूर्वीच मुख्यमंत्र्यांकडे केल्याचे सांगत पालकमंत्री शिरसाट म्हणाले की, सध्याची परिस्थिती, मुख्यमंत्र्यांचे दौरे आणि प्रशासकीय धावपळीमुळे मंत्रिमंडळाची बैठक होणार की नाही याबाबत अद्याप स्पष्टता नाही.
परंतु, यंदा मराठवाड्याला भरीव आर्थिक तरतूदीची आवश्यक आहे. त्यामुळे मुंबईतील येत्या कॅबिनेट बैठकीत मराठवाड्याची दुष्काळी स्थिती मांडून मराठवाड्यात मंत्रिमंडळ बैठक घेण्याचा आग्रह आपण पुन्हा एकदा मुख्यमंत्र्यांकडे करणार असल्याचे शिरसाट यांनी सांगितले.
विविध कामांचे लोकार्पण, उद्घाटन
१७ सप्टेंबरच्या कार्यक्रमात छत्रपती संभाजीनगर शहरातील विविध विकासकामांचे उद्घाटन व लोकार्पण करण्यात येणार आहे. महापालिका हद्दीतील विकासकामांसह केंब्रिज शाळा चौकातील राजमाता जिजाऊ चौकाचे लोकार्पण, विभागीय क्रीडा संकुलातील सिंथेटिक ट्रॅक यासह विविध कामांचा यात समावेश आहे.
