Chhatrapati Sambhajinagar news
छत्रपती संभाजीनगर: छत्रपती संभाजीनगरच्या वाळूज महानगर परिसरात आज एक धक्कादायक घटना उघडकीस आली आहे. तिसगाव चौफुली येथे गादीत गुंडाळलेल्या अवस्थेत २० वर्षीय तरुणीचा मृतदेह आढळून आल्याने परिसरात खळबळ उडाली आहे. घरातील सामानासोबत एका रिक्षातून हा मृतदेह संशयास्पदरीत्या नेला जात असताना पोलिसांनी तो पकडला.
मिळालेल्या माहितीनुसार, एका रिक्षातून काही लोक घरातील साहित्यासह गावाकडे जात होते. मात्र, तिसगाव चौफुली परिसरात पोलिसांना या रिक्षातील हालचाली संशयास्पद वाटल्या. पोलिसांनी रिक्षा थांबवून तपासणी केली असता, गादीत गुंडाळलेल्या अवस्थेत एका २० वर्षीय तरुणीचा मृतदेह पाहून पोलीसही चक्रावून गेले.
पोलिसांनी तातडीने चौकशी केली असता, मुलीच्या सावत्र आईने धक्कादायक माहिती दिली. "मुलीचे प्रेमसंबंध होते, त्यातून तिने गळफास घेऊन जीवन संपवले. बदनामी टाळण्यासाठी आणि अंत्यसंस्कारासाठी आम्ही मृतदेह गुपचूप गावाकडे नेत होतो," असा दावा पालकांनी केला आहे.
हा प्रकार आत्महत्येचा आहे की घातपात, याचा तपास आता वाळूज एमआयडीसी पोलीस करत आहेत. पोलिसांनी संशयित सावत्र आई आणि वडिलांना ताब्यात घेतले आहे. मृतदेह उत्तरीय तपासणीसाठी शासकीय रुग्णालयात पाठवण्यात आला आहे. सध्या संशयास्पद मृत्यूची नोंद करण्यात आली असून, शवविच्छेदन अहवालानंतरच मृत्यूचे नेमके कारण स्पष्ट होईल.
