पिशोर, पुढारी वृत्तसेवा : आठ ट्रकमधून १११ म्हशी नेल्या जात होत्या. याबाबतची माहिती मिळाल्यावर पिशार पोलिसांनी ही वाहने थांबवून म्हैशींची सुटका केली. पोलिसांनी केलेल्या कारवाईत २ कोटी ७ लाख ५० हजारांचा मुद्देमाल जत करण्यात आला. बुधवारी (दि.३) सकाळी ही कारवाई करण्यात आली.
सिल्लोड कडून कन्नडकडे आठ ट्रकमधून जनावरांची तस्करी केल्या जात असल्याची माहिती पिशोर पोलीस ठाण्याचे सपोनि शिवाजी नागवे यांना मिळाली होती. नागवे यांनी उपनिरीक्षक ढगारे, जमादार वसंत पाटील, विलास सोनवणे, सुनील भिवसने, दत्ता लोखंडे, लगड, कन्हाळे, अन्सार पटेल, सोनवणे, पणन खामाट आदींच्या पथकाद्वारे खडकी पुलाजवळ सापळा लावला.
काही वेळात सिल्लोडकडून एकामागे एक अशा आठ आयशर वाहने येत असल्याने पाहून पथक सतर्क झाले. ही सर्व वाहने पोलिसांनी थांबवली. सदरील वाहनांच सपोनि नागवे आणि पोलीस कर्मचारी यांनी तपासणी केल्यावर प्रत्येक ट्रकमध्ये दाटीवाटीने उभ्या असलेल्या म्हशी दिसाल्या. याबाबत चालकांना विचारणा केली असता सिल्लोड कडून कन्नडमार्गे छत्रपती संभाजीनगरकडे जनावरे नेत असल्याने त्यांनी सांगितले.
सर्व आठ चाहनांतून सुमारे १३० म्हशी तसेच एक रेडा अशी जनावरे खाली उतरविण्यात आली. यातील तीन म्हशींचा गुदमरल्याने मृत्यू झाला. तर सात गंभीर जखमी अवस्थेत होत्या. तसेच आणखी अनेक म्हैशी जखमी अवस्थेत दिसून आल्या.
आठ वाहने पिशोर पोलीस ठाण्यात आणून जमा करण्यात आली. मध्यप्रदेशमधील बरहाणपूर येथून छत्रपती संभाजीनगर येथील कारखान्यात या म्हशी नेल्या जात असल्याचे पोलिसांनी सांगितले. या प्रकरणी आयशर (एम एच २४९ ए यु २६२५) चालक एम मनीष अहिरवाल (वय ३१, काली बावडी, जि. धार), आयशर (सी, जी, ०४ एन डब्लू ८८०३) चालक मुस्तकीम मुकीम खान (वय २५, रा. इमरानी, जि. खरगोन), आयकर (एम एस १८ बी एच ५११६) चालक संजयखान फिरोजखान (वय २८, जि. खरगोन), आयशर (एम एच १८ बी एच ०७०७) चालक रमजानखान छोटेखान (वय २६, रा. बाळसमंद जि. खरगोन), फिरोजखान छोटेखान (वय ३५, रा. बाळसमंद, जि. खरगोन) आयशरचा (एम एच १८ बी जी ८५१४) चालक जुनेद खान रियान खान (वय २१, रा. बाळसमंद जि. खरगोन), आयशरचा (एम एच १८ बी एच ५०९८) चा चालक इम्रान अल्लाउद्दीन पटेल (वय २८, रा. जळगाव, ह. मु. संजयनगर) आदींवर गुन्हा दाखल करण्याची प्रक्रिया रात्री उशीरा पर्यंत सुरु होती.
पोलिसांनी सर्व वाहने सिल्लोड तालुक्यातील पळशी गावाकडे वळवली. तेथे श्री गणेश गोशाळेत ही जनावरे सोडण्यात आली. गोशाळेकडून या जनावरांची काळजी घेण्यात येत आहे.
