बीड, पुढारी वृत्तसेवा: गेवराई (Beed) येथील सरस्वती कॉलनीत एका बँक अधिकाऱ्याच्या घरी दरोडेखोरांनी दाम्पत्याची हत्या आणि दोन मुलींवर हल्ला केल्याची घटना घडली होती. दोन मुलींपैकी एका गर्भवती तरुणीचा मृत्यू झाला होता. पाच वर्षांपूर्वीच्या या घटनेतील दोन आरोपींना आज (दि. १७) प्रमुख जिल्हा व सत्र न्यायालयाने जन्मठेपेची शिक्षा सुनावली आहे.
याबाबतच्या अधिक माहितीनुसार, गेवराई (Beed) शहरातील गणेशनगरातील सरस्वती कॉलनीत आदिनाथ उत्तमराव घाडगे (वय ५०) हे बँक अधिकारी राहत होते. त्यांच्या घरी दि.२४ ऑगस्ट २०१७ रोजी पहाटे साडेतीन वाजण्याच्या सुमारास दरोडेखोरांनी कटावणीने कडी कोयंडा तोडून आत प्रवेश केला. दरोडेखोरांनी आदिनाथ व अलका घाडगे (वय ४२) यांच्यावर धारदार शस्ञांनी हल्ला चढवला. यानंतर बाळंतपणासाठी आलेली मुलगी वर्षा संदीप जाधव (वय २२) व स्वाती घाडगे (वय १८) या दोन्ही मुलींवरही धारदार शस्ञाने हल्ला करून ऐवज लुटला होता. या हल्ल्यात घाडगे दाम्पत्याचा जागीट मृत्यू झाला, तसेच जखमी वर्षाचा देखील उपचारादरम्यान मृत्यू झाला होता.
गेवराई ठाण्यात या प्रकरणाचा गुन्हा दाखल झाल्यानंतर तत्कालीन पोलीस अधीक्षक जी. श्रीधर, उपअधीक्षक डॉ. अर्जुन भोसले यांनी याचा तपास सुरु केला. त्यानंतर सोमा शेरू भोसले (रा. केकतपांगरी, ता.गेवराई) व लखन प्रताप भोसले (रा.कौडगाव, घोडा ता.परळी) यांना अटक केली होती. आरोपींकडून घाडगे यांच्या घरातून चोरून नेलेला मोबाइल हस्तगत केला होता. तपास करून उपाधीक्षक डॉ. अर्जुन भोसले यांनी दोषारोपपत्र न्यायालयात दाखल केले.
दरम्यान प्रमुख जिल्हा सत्र न्या. हेमंत महाजन यांच्यासमोर प्रकरणाची सुनावणी झाली. जिल्हा सरकारी वकील अजय राख यांनी सरकारी पक्षाकडून बाजू मांडली. याप्रकरणात त्यांनी २२ साक्षीदार तपासले. अजय राख यांचा युक्तिवाद, साक्षीपुरावे ग्राह्य धरून न्या. हेमंत महाजन यांनी दोन्ही आरोपींना १६ जानेवारीला दोषी ठरवले. १७ जानेवारीला जन्मठेपेची शिक्षा व प्रत्येकी पाच हजार रुपये दंड अशी शिक्षा सुनावली.
हेही वाचा
