Hatkanangale Nagaon House Burglary
नागाव : हातकणंगले तालुक्यातील नागाव येथील माळवाडी परिसरात मंगळवारी मध्यरात्री चोरट्यांनी धुमाकूळ घातला. एकाच गल्लीतील तीन घरे लक्ष्य करत चोरट्यांनी सुमारे १३ ते १५ लाख रुपयांचा मुद्देमाल लंपास केला. यामध्ये ११ तोळे सोने, चांदी आणि रोख रकमेचा समावेश आहे. धक्कादायक बाब म्हणजे, चोरी झालेल्या घरांमध्ये सांगली ग्रामीण पोलीस ठाण्यातील एका सहाय्यक पोलीस निरीक्षकाच्या (API) घराचाही समावेश आहे. या धाडसी चोरीमुळे नागाव आणि परिसरात घबराटीचे वातावरण पसरले आहे.
सांगली ग्रामीण पोलीस ठाण्यात कार्यरत असलेले सहाय्यक पोलीस निरीक्षक नितीन बाबर यांचे कुटुंब नागावच्या माळवाडी परिसरात राहते. मंगळवारी रात्री बाबर यांना कामावरून घरी येण्यास उशीर होणार होता. रात्रीच्या वेळी आई-वडिलांची झोपमोड होऊ नये, म्हणून त्यांनी घराला बाहेरून कुलूप लावून चावी खिडकीत ठेवली आणि आई-वडील वरच्या मजल्यावर झोपायला गेले.
काही कारणास्तव एपीआय बाबर रात्री घरी पोहोचू शकले नाहीत. याच संधीचा फायदा घेत मध्यरात्री अडीचच्या सुमारास चोरट्यांनी कुलूप व कडी-कोयंडा उचकटून घरात प्रवेश केला. कपाटातील ११ तोळे सोने, ६ भार चांदी आणि ७ हजार रुपयांची रोकड चोरून चोरटे पसार झाले.
चोरट्यांनी केवळ पोलीस अधिकाऱ्याच्याच नव्हे, तर त्याच गल्लीतील इतर दोन ठिकाणांनाही लक्ष्य केले. सागर सदाशिव सावंत (किराणा व टेलरिंग दुकान): चोरट्यांनी दुकानाचे कुलूप तोडून गल्ल्यातील २२ हजार रुपयांची रोकड लंपास केली.
बाबासो सावंत (घर): चोरट्यांनी घराचा कडी-कोयंडा उचकटून आत प्रवेश केला, मात्र सुदैवाने त्यांच्या हाती काहीही लागले नाही.
महत्त्वाची घडामोड: चोरीची माहिती मिळताच शिरोली पोलिसांनी तातडीने घटनास्थळी धाव घेतली. परिसरातील सीसीटीव्ही फुटेज तपासले असता, मध्यरात्रीच्या सुमारास ५ ते ६ संशयित चोरटे दबा धरून वावरताना स्पष्टपणे दिसत आहेत.
घटनेचे गांभीर्य ओळखून करवीर उपविभागीय पोलीस अधिकारी आप्पासाहेब पोवार यांनी घटनास्थळाची पाहणी करून तपासाबाबत महत्त्वाच्या सूचना दिल्या.
तपासासाठी श्वानपथक आणि ठसेतज्ज्ञांना पाचारण करण्यात आले होते. श्वानाने घटनास्थळापासून काही अंतरापर्यंत माग काढला आणि तो गल्लीतच घुटमळला. यामुळे चोरटे वाहनाचा वापर करून पसार झाले असावेत, असा संशय आहे. शिरोली पोलीस ठाण्यात या गुन्ह्याची नोंद करण्यात आली असून, पोलीस चोरट्यांच्या शोधात आहेत.
