कोल्हापूर : कुरुंदवाड-नांदणी रस्त्यावर एकाचा निर्घृण खून
कुरुंदवाड : पुढारी वृत्तसेवा – कुरुंदवाड-नांदणी दरम्यानच्या रस्त्यावर गट क्रमांक १०१२/१ यांच्या शेतालगत अनोळखी स्विफ्ट कारमध्ये संतोष विष्णू कदम (वय ३६, रा. गावभाग सांगली) या युवकाची धारदार चाकूने हत्या करण्यात आली. ड्रायव्हर लगत असणाऱ्या सीटवर संतोष यांचा मृतदेह आढळून आला. अज्ञात मारेकऱ्यांनी पलायन केले आहे. दरम्यान, पोलिसांनी पंचनामा करत असताना वाहनांमध्ये दोन धारदार चाकू आणि गाडीच्या पाठीमागे दोन स्पोर्ट्स बूट आणि संतोष कदम यांचा झटापटीमध्ये फुटलेला मोबाईल वाहनात मिळून आला आहे.
संबंधित बातम्या –
- परभणी : जिंतूर तालुक्यातील भूसंपादन प्रकरणी जिल्हाधिकाऱ्यांना उच्च न्यायालयाची नोटीस
- गीताभक्ती अमृत महोत्सवापासून नास्तिकही दूर राहू शकणार नाहीत : श्री श्री रविशंकर
- श्रीमंतांनी आरक्षण सोडून द्यावे; सर्वोच्च न्यायालयाचे मत
नांदणी रस्ता हा रहदारीचा असल्याने पेट्रोल संपले म्हणून कुणीतरी गाडी लावून गेला असावा, असे समजून कोणीही लक्ष दिले नाही. पहाटे सहा वाजल्यापासून ही गाडी रस्त्यावर थांबून होती. १२ वाजण्याच्या सुमारास शेतकऱ्यांनी डोकावून पाहिले असता रक्तबंबाळ अवस्थेतील मृतदेह दिसून आल्याने कुरुंदवाड पोलिसांना माहिती दिली.
घटनास्थळी तात्काळ सपोनी रविराज फडणीस पोलीस फाट्यासह दाखल झाले. काही क्षणातच पोलीस उपाधीक्षक समीरसिंह साळवे, सांगली शहरचे पोलीस निरीक्षक विजय मोरे, गुन्हे अन्वेषण विभाग, फॉरेन्सिक तपासणी केंद्राचे आणि स्वामी पथक घटनास्थळी दाखल होऊन तपासाची चक्री गतिमान केली आहेत.
तथापि फॉरेन्सिक लॅबच्या अधिकाऱ्यांच्या उपस्थितीत वाहनाची दरवाजे खुली करून मृतदेह शवविच्छेदनासाठी पाठवण्यात आला आहे. वाहनातून दोन धारदार चाकू, स्पोर्ट्स बूट जप्त करण्यात आले आहेत. मोबाईल फुटलेल्या अवस्थेत मिळून आला असल्याने खुनावेळी झटापट झाल्याचे दिसते.