कोल्हापूर : पुढारी वृत्तसेवा : आधारकार्ड बनवून देण्यासह विविध ऑनलाईन कामे तो करत होता… सुविधा केंद्रात दिवसभर तो कामात व्यस्त असायचा…. स्वत:जवळील काही पैसे त्याने झटपट फायदा देणार्या कंपनीकडे गुंतवले… यातच त्याचे पैसे अडकले…. त्यानंतर आपल्याजवळील ज्ञानाचा वापर त्याने चक्क बनावट नोटा छापण्यासाठी केला…. सहा महिन्यांपासून सुरु असलेला हा त्याचा गोरखधंदा अखेर कोल्हापूर पोलिसांनी उघडकीस आणला. संशयित संदीप बाबू कांबळे (वय ३८, रा. आंबेडकरनगर, कळे, ता. पन्हाळा) याला पोलिसांनी बेड्या ठोकल्या असून बनावट नोटा छपाईचे रॅकेट समोर आले आहे. या टोळीकडून पाचशे व शंभर रुपयांच्या ४ लाख ४५ हजार रुपयांच्या बनावट नोटा पोलिसांनी जप्त केल्या आहेत.
याप्रकरणी चंद्रशेखर बाळासाहेब पाटील (वय ३४, रा. कसबा तारळे, ता. राधानगरी), अभिजीत राजेंद्र पवार (वय ४०, रा. गडमुडशिंगी, ता. करवीर), दिग्विजय कृष्णात पाटील (वय २८, रा. जयभवानी तालमीसमोर, शिरोली पुलाची) या तिघांना अटक करण्यात आली आहे.
कळे गावाहून काही संशयित बनावट नोटा घेवून शहरातकडे जाणार असल्याची गोपनीय माहिती स्थानिक गुन्हे शाखेचे पोलीस अंमलदार विजय गुरखे यांना मिळाली होती. त्यांनी पोलीस निरीक्षक संजय गोर्ले यांना ही माहिती कळवली. यानंतर तातडीने उपनिरीक्षक शेषराज मोरे, वैभव पाटील, सचिन देसाई, अनिल पास्ते, हिंदूराव केसरे, रणजित पाटील, दीपक घोरपडे, सोमराज पाटील व रफिक आवळकर यांचे पथकाने कोल्हापूर ते गगनबावडा जाणारे रोडवरील मरळी फाटा येथे सापळा लावला होता. यावेळी संशयास्पद कार येताच ती अडविण्यात आली. यातील संशयित चंद्रशेखर पाटील, अभिजीत पवार, दिग्विजय पाटील यांच्याकडे चौकशी करुन अंगझडती घेतली असता बनावट नोटा मिळून आल्या.
संशयितांकडे मिळालेल्या नोटा त्यांनी कळे येथील संदीप कांबळेकडून आणल्याचे सांगितले. पोलिसांनी त्याच्या घरी जावून झडती घेतली असता बनावट नोटा तयार करण्याचे संगणक, प्रिंटर व इतर साहित्य मिळून आले. तसेच बनावट नोटाही जप्त करण्यात आल्या.
संशयित संदीप कांबळे कळे येथे आधार केंद्रात कामे करत होता. फोटो शॉपीद्वारे ही कामे करत करत त्याने नोटांची हुबेहुब नक्कल करण्यास सुरुवात केली. यातच तो एका आर्थिक गुंतवणुकीत तोट्यात गेल्याने बनावट नोटांची छपाईच घरात सुरु केली होती. मागील पाच महिन्यांपासून तो ही छपाई करत असल्याची प्राथमिक माहिती समोर आली आहे.
हेही वाचा?
