सावंतवाडी, पुढारी वृत्तसेवा : मी सावंतवाडी विधानसभा मतदार संघातून आगामी निवडणुकीत आमदारकी लढविण्यास आजही इच्छुक आहे. मात्र भाजपाने दीपक केसरकर किंवा राजन तेली यांना तिकीट दिल्यास त्यांना निवडून आणण्यासाठी त्यांचा प्रचार करेन, अशी भूमिका सावंतवाडी माजी नगराध्यक्ष तथा भाजपाचे जिल्हा प्रवक्ते संजू परब यांनी आज (दि.२८) सावंतवाडीत व्यक्त केली. परब यांनी आज सावंतवाडीत पत्रकार परिषद घेतली होती. त्यावेळी ते बोलत होते.
यावेळी परब म्हणाले, या ठिकाणी गेली २० वर्षे मी राजकारण आणि समाजकारणात काम करीत आहे. त्यामुळे सावंतवाडी विधानसभेची आमदारकी लढविण्यास मी आजही इच्छुक आहे. माझ्या सोबत मनोज नाईक सुध्दा इच्छुक आहेत. आम्हाला संधी मिळावी, यासाठी आमचे प्रयत्न असतील. परंतु आयत्यावेळी दीपक केसरकर किंवा राजन तेलींना पक्षाकडून तिकीट मिळाल्यास आम्ही पक्षाने दिलेल्या उमेदवाराचा प्रचार करू आणि त्यांना निश्चितच निवडून आणू, असे स्पष्टीकरण सावंतवाडी विधानसभा मतदारसंघाबाबत बोलताना परब यांनी केले. यावेळी माजी नगरसेवक मनोज नाईक, बंटी राजपुरोहीत प्रसन्ना देसाई मोहन सावंत आदी उपस्थित होते.
सावंतवाडीत दोन युवकांच्या अंगावर झाड पडून घडलेला अपघात दुर्दैवी आहे, असाच प्रकार वीज तारा तुटून ८ वर्षापुर्वी दोन युवकांना जीव गमवावा लागला होता. त्यामुळे या प्रकाराची गंभीर दखल घेवून नगरपरिषद प्रशासनाने शहरातील जीर्ण झाडे तात्काळ तोडावीत. विशेषतः आठवडा बाजाराच्या परिसरात असलेली न्यायालयाच्या परिसरातील झाडे तोडावीत, अन्यथा मुख्याधिकार्यांना घेराव घालू, असा इशाराही परब यांनी दिला.
हेही वाचा :
