रत्नागिरी : चिखली येथे खोपीखाली आढळला बिबट्याचा बछडा

साडवली; पुढारी वृत्तसेवा : संगमेश्वर तालुक्यातील चिखली येथील समीर हुसैन हुजुरे यांच्या राहत्या घराच्या मागील बाजूस लाकडाच्या खोपीखाली शनिवारी सकाळी ९ वाजण्याच्या सुमारास बिबट्याचा बछडा आढळून आला. मानवी वस्तीत बिबट्याचा बछडा आढळल्याने खळबळ उडाली आहे.

• सह्याद्रीत घुमली वाघाची डरकाळी; राज्यात वाघांची संख्या २५ टक्क्यांनी वाढली

या बाबत वनविभागाकडून मिळालेल्या अधिक माहितीनुसार, चिखली येथील समीर हुसैन हुजुरे यांच्या राहत्या घराच्या मागील बाजूस लाकडाच्या खोपीखाली बिबट्याचा बछडा असल्याची माहिती पोलिस पाटील रूपेश कदम यांनी देवरूखचे परिमंडल वनअधिकारी तौफिक मुल्ला यांना दिली. यानुसार रत्नागिरीचे परिक्षेत्र वनअधिकारी प्रकाश सुतार यांनी त्यांचे अधिनस्त वनकर्मचारी समवेत घटनास्थळी जाऊन बिबट्याच्या बछड्याची पाहणी केली.

पाहणीअंती बछड्याच्या अंगावर कोणतीही जखम दिसून आली नाही. यानंतर या बछड्याला ताब्यात घेऊन पशुधन विकास अधिकारी देवरूख यांचे मार्फत तपासणी करून घेतल्यानंतर ते अशक्त असल्याचे पशुसंवर्धन अधिकारी यांनी सांगितले. त्यामुळे मानद वन्यजीव रक्षक रत्नागिरी नीलेश बापट यांनी खात्री केली. या बछड्याला उपचारासाठी वन्यप्राणी प्राथमिक उपचार केंद्र पुणे येथे तत्काळ पाठवण्यात आले आहे. हा बछडा हा मादी जातीचा असून त्याचे वय अंदाजे २ ते ३ महिने आहे.

पुढील कार्यवाही विभागीय वनअधिकारी, चिपळूण दिपक खाडे, सहाय्यक वनसंरक्षक चिपळूण वैभव बोराटे यांच्या मार्गदर्शनाखाली परिक्षेत्र वनअधिकारी, रत्नागिरी प्रकाश सुतार, परिमंडळ वनअधिकारी, देवरूख तौफिक मुल्ला करत आहेत. अशा प्रकारे वन्यजीव अडचणीमध्ये सापडल्यास वनविभागाचा टोल फ्री क्रमांक १९२६ किंवा ९४२१७४१३३५ या क्रमांकावर संपर्क करण्याचे आवाहन करण्यात येत आहे.

हेही वाचा : 

• नाशिक : दिंडोरीत सात उंट मालकांविरुद्ध गुन्हा दाखल
• रायगड : कामोठेच्या हुक्का पार्लरमध्ये राडा; युवक जखमी, १५ ते २० जणांच्या टोळक्याकडून मारहाण
• भोर : भाटघर 20, निरा देवघर धरणात अवघा 36 टक्के पाणीसाठा