अहमदनगर; पुढारी वृत्तसेवा : ओंकार भागानगरे हत्याकांड प्रकरणी रेकी करून हल्लेखोरांना माहिती पुरविणार्या आणखी एकाला पोलिसांनी अटक केली. अनिकेत साळुंखे असे त्याचे नाव आहे. गणेश हुच्चे, नंदू बोराटे व अनिकेत साळुंखे या तिघांना शनिवारी (दि.23) न्यायालयात हजर केले असता 27 जूनपर्यंत न्यायालयाने पोलिस कोठडी सुनावली आहे. मुख्य आरोपी असलेले हुच्चे व बोराटे या दोघांच्या मुसक्या स्थानिक गुन्हे शाखेने शुक्रवारी (दि.22) आवळल्या.
हैद्राबाद येथे पळून जाण्याच्या तयारीत असताना दोघांना पुणे रेल्वेस्थानकातून ताब्यात घेतले. तर, संदीप गुडा याच्या मागावर पोलिस आहेत. ओंकार भागानगरे, ओंकार घोलप, शुभम पडोळे यांच्यावर पाळत ठेऊन हल्लेखोरांना माहिती पुरविणार्या वैभव हुच्चे (रा.माळीवाडा), सागर गुडा (रा.कल्याण रस्ता), रवी नामदे (रा.भिंगार) या तिघांना एलसीबीने सुरुवातीला अटक केली. त्यानंतर गणेश हुच्चे व नंदू बोराटे या दोघांच्या मुसक्या आवळल्या. हुुच्चे याच्या पानटपरीवर काम करणार्या अनिकेेत साळुंखे याला अटक करण्यात आली. आरोपींची संख्या सहा झाली असून, सर्वच आरोपींना 27 जूनपर्यंत पोलिस कोठडी सुनावण्यात आली आहे. गुन्ह्याचा तपास पोलिस निरीक्षक मधुकर साळवे करीत आहेत.
गणेश हुच्चे व नंदू बोराटे या दोघांनी खुनाची कबुली दिली आहे. पोलिसांनी गुन्ह्यात वापरलेल्या दोन तलवारी जप्त केल्या आहेत. तसेच, दोन मोपेड दुचाकीही जप्त केल्या.
हेही वाचा
