पुणे : हत्तींच्या संवर्धनासाठी आता त्यांच्या डीएनए जतनाचे काम भारत सरकारच्या 'हत्ती प्रकल्प'ने (प्रोजेक्ट एलिफंट) नुकतेच सुरू केले असून, सध्या देशभरात बंदिस्त वातावरणात राहणार्या सुमारे 2 हजारांपैकी 270 हत्तींच्या डीएनएचे जतन झाले आहे. देशात सद्य:स्थितीत फक्त 27 हजार हत्ती शिल्लक आहेत. त्यामुळे जंगलातील हत्तींच्या कानावर मायक्रोचिप बसवून त्यांच्या डीएनएचे जतन केले जाणार आहे. देशात संघटितपणे होणार्या हत्तींच्या शिकारीचे प्रमाण पाचपटीने वाढले आहे.
दहा वर्षांपूर्वी देशात हत्तींची संख्या एक लाख होती, ती आता केवळ 27 हजार 500 इतकी आहे. आशियाई हत्तींची संख्या जगात भारतात सर्वाधिक असून, नर हत्तींच्या शिकारीचे प्रमाण मादी हत्तींच्या तुलनेत 70 टक्क्यांनी जास्त आहे. कारण, आशियाई नर हत्तींना मोठे सुळे येतात. त्यामुळे त्यांची शिकार वेगाने होत आहे. आगामी दहा वर्षांत हत्तींच्या अनेक प्रजाती नामशेष होण्याची भीती तज्ज्ञांनी व्यक्त केली आहे.
हस्तिदंताची जगभरात मोठी मागणी आहे. त्यापासून विविध शोभेच्या वस्तू अन् दागिनेही तयार केले जातात. त्यामुळे हत्तींच्या शिकारीचे प्रमाण जगभरासह भारतातही वाढले आहे. प्रामुख्याने आशियाई व आफ्रिकन हत्तींची संख्या जगात जास्त होती. ती आता खूप कमी होत आहे. त्यावर काम करण्याच्या हेतूने 12 ऑगस्ट 2012 पासून जागतिक हत्ती दिन जगभर पाळला जाऊ लागला. यंदा हत्ती दिनाचे 11वे वर्ष आहे. हत्तींच्या शिकारीविरोधात भारतात अनेक स्वयंसेवी संस्था कार्यरत आहेत.
देशातील हत्तींच्या संवर्धनासाठी भारत सरकारच्या पर्यावरण मंत्रालयाने 1992 मध्ये हत्ती प्रकल्प (प्रोजेक्ट एलिफंट) सुरू केला. देशात आता फक्त 27 हजार 500 हत्ती शिल्लक आहेत. यापैकी 2 हजार 675 बंदिस्त ठिकाणी राहतात. त्यातील 270 हत्तींच्या डीएनए प्रोफायलिंगचे काम पूर्ण झाले आहे. 'प्रोजेक्ट एलिफंट'ला 30 व वर्षे पूर्ण होत आहेत. त्यानिमित्त यंदा 7 व 8 एप्रिल रोजी आसाममधील काझिरंगा अभयारण्यात 'गज उत्सव' साजरा केला जाणार आहे. त्याचे उद्घाटन राष्ट्रपती दौपदी मुर्मू करणार आहेत. उद्घाटन तसेच वन अधिकार्यांसाठी 'गज सूचना' मोबाईल अॅप सुरू करण्यात आले आहे.
– केरळ 3054, तामिळनाडू 2791,ओडिशा 1966, मेघालय 1754, आसाम 5719, कर्नाटक 6049, अरुणाचल 1614, झारखंड 679, नागालँड 432, छत्तीसगड 0247, त्रिपुरा 203, उत्तर प्रदेश 232, पश्चिम बंगाल 700, तेलंगण 57, राजस्थान 84, मध्य प्रदेश 07, महाराष्ट्र 06, मिझोराम 07.
हेही वाचा