Pakistan Cricket Team : T-20 वर्ल्डकपपूर्वी पाकिस्तान संघात मोठे फेरबदल, ‘मॅच फिक्सर’चे पुनरागमन

पुढारी ऑनलाईन डेस्‍क : क्रिकेट टी-20 वर्ल्डकप २०२४ स्‍पर्धेला १जूनपासून प्रारंभ होणार आहे. त्‍यापूर्वी पाकिस्‍तानच्‍या संघात मोठे फेरबदल करण्‍यात आले आहेत. पाकिस्तानचा संघ घरच्या मैदानावर न्यूझीलंडविरुद्ध पाच सामन्यांची टी-20 मालिका खेळणार आहे. या मालिकेसाठी पाकिस्तानचा संघ जाहीर करण्यात आला आहे.  मॅच फिक्सिंग प्रकरणात अडकलेला मोहम्मद आमिरचे पाकिस्तान क्रिकेट संघात पुनरागमन झाले आहे. इमाद वसीमही निवृत्तीवरून परतला आहे. कर्णधारपदाची धुरा बाबर आझमकडे असेल.मात्र पाकिस्तान क्रिकेट बोर्डाने (पीसीबी) आपल्या उपकर्णधार कोण असेल हे जाहीर केलेले नाही.

पाकिस्तानी संघ नुकताच T20 विश्वचषक 2024 पूर्वी काकुलमध्ये लष्करी प्रशिक्षण घेताना दिसला होता, त्याचे अनेक व्हिडिओ सोशल मीडियावर व्हायरल झाले होते. मात्र, आता पाकिस्तानी संघ 18 ते 27 एप्रिल दरम्यान न्यूझीलंडविरुद्ध पाच सामन्यांची टी-20 मालिका खेळणार आहे. या मालिकेसाठी 17 खेळाडूंचा समावेश असलेल्या पाकिस्तान क्रिकेट संघाची घोषणा करण्यात आली आहे. पाच सामन्यांच्या T20 मालिकेतील सामने रावळपिंडी, लाहोर येथे खेळवले जातील. मोहम्मद आमिर आणि इमाद वसीम यांच्याशिवाय दोन नवे चेहरेही संघात आले आहेत. यामध्ये अनकॅप्ड खेळाडू मोहम्मद इरफान खान आणि धडाकेबाज सलामीवीर उस्मान खान यांचा समावेश आहे.

Pakistan Cricket Team : 'मॅच फिक्सिंग'मध्‍ये अडकलेला आमिर संघात परतला

31 वर्षीय आमिरनेही नुकतीच निवृत्तीतून परतण्याची घोषणा केली होती. ३० ऑगस्ट २०२० रोजी मोहम्मद आमिर पाकिस्तानकडून शेवटचा टी-२० आंतरराष्ट्रीय खेळला होता. 2010 मध्ये पाकिस्तानच्या इंग्लंड दौऱ्यात आमिरसह सलमान बट आणि मोहम्मद आसिफ यांना स्पॉट फिक्सिंगसाठी बंदीचा सामना करावा लागला होता. 2016 मध्ये त्याची शिक्षा भोगून आणि आंतरराष्ट्रीय क्रिकेटमध्ये पुनरागमन करूनही आमिर क्रिकेटमध्ये वादग्रस्त राहिला आहे.

अलीकडेच माजी पाकिस्तानी क्रिकेटपटू रमीझ राजाने स्पॉट-फिक्सिंग प्रकरणात अडकलेल्या मोहम्मद आमिरचा समाचार घेतला होता. त्‍यांनी  एका टीव्ही मुलाखतीत सांगितले होते की, आमिरचे स्पॉट-फिक्सिंग प्रकरण अजूनही त्याच्या मनात आहे. त्यांच्या नजरेत आमिरची कलंकित प्रतिमा आजही कायम आहे.  मी क्रिकेटमधील गोष्टी सुरळीत करण्याचा कोणताही ठेका घेतलेला नाही; पण त्या फिक्सिंगमुळे आमच्यावर (पाकिस्तान) जगभर टीका झाली. तो म्हणाला की जेव्हा फिक्सिंग प्रकरण घडले तेव्हा मी कॉमेंट्री करत होतो, मी त्‍याला आजही माफ करणार नाही. असे अनेक लोक असतील जे त्यांच्याबद्दल सहानुभूती दाखवतील. पण त्यांच्या पुस्तकात याबद्दल कोणतीही माफी नाही, जर माझा मुलगाही, देव न करो, असे करत असेल तर मी त्याला नाकारले असते.

इमाद वसीम घेतली निवृत्तीचा निर्णय मागे

पाकिस्तानी संघात निवड झालेल्या इमाद वसीमने नोव्हेंबर 2023 मध्ये आंतरराष्ट्रीय क्रिकेटमधून निवृत्ती जाहीर केली, परंतु पाकिस्तान सुपर लीग (PSL) मधील चमकदार कामगिरीनंतर त्याने यू-टर्न घेतला. तो आता न्‍यूझीलंड विरुद्‍धच्‍या मालिकेत खेळणार आहे. मागील वर्षीही तो न्यूझीलंडविरुद्ध मालिकेत खेळला होता. इमादने 55 एकदिवसीय सामने खेळले आहेत. त्याच्या नावावर 986 धावा आणि 44 विकेट आहेत. याशिवाय त्याने 66 टी-20 आंतरराष्ट्रीय सामन्यांमध्ये 486 धावा केल्या आहेत, तर 65 विकेट्सही घेतल्या आहेत.

हेही वाचा : 

• U-19 Cricket WC Final : भारताचा पुन्हा 'हार्टब्रेक'; अंडर-19 वर्ल्डकप स्पर्धेत ऑस्ट्रेलिया 'चॅम्पियन'
• Test Cricket : डावखुर्‍या विदेशी फिरकीपटूंची भारताविरुद्ध कसोटीतील संस्मरणीय कामगिरी