नवी दिल्ली : लोकसभा अध्यक्षपदाची निवडणूक तोंडावर आली असताना एनडीएसह इंडिया आघाडीमध्येही खलबते सुरू आहेत. काँग्रेस अध्यक्ष मल्लिकार्जुन खर्गे यांच्या निवासस्थानी इंडिया आघाडीची बैठक पार पडली. या बैठकीमध्ये लोकसभा अध्यक्ष पदाच्या निवडणुकी संदर्भात चर्चा करण्यात आली. लोकसभा अध्यक्ष पदावरून इंडिया आघाडीमध्ये मतभेद असल्याच्या चर्चा होत्या. या पार्श्वभूमीवर या बैठकीच्या माध्यमातून खर्गे यांनी या चर्चांना पूर्णविराम देण्याचा प्रयत्न केला.
या बैठकीला मल्लिकार्जुन खर्गे यांच्यासह राहुल गांधी, के. सी. वेणूगोपाल, राष्ट्रवादी काँग्रेसच्या (शरद पवार गट) नेत्या खा. सुप्रिया सुळे आणि तृणमूल काँग्रेसचे कल्याण बॅनर्जीही उपस्थित होते. तसेच समाजवादी पक्षाचे सरचिटणीस प्रा. राम गोपाल यादव, शिवसेना ठाकरे गटाचे अरविंद सावंत, द्रमुक नेते टी. आर. बालू, एन. के. प्रेमचंद्रन, हनुमान बेनिवाल यांच्यासह विरोधी पक्षांच्या इंडिया आघाडीचे विविध नेते उपस्थित होते.
इंडिया आघाडीच्या बैठकीमध्ये उद्या (बुधवारी) लोकसभा अध्यक्षपदासाठी मतदान करण्याच्या रणनीतीवर चर्चा झाली. संसदेच्या अधिवेशनादरम्यान इंडिया आघाडीतील सर्व घटक पक्षांमध्ये सामंजस्य कसे राहील, यावरही भर देण्यात आला.
