उद्धव ठाकरेंना ‘घरकोंबडा’ म्हणावं लागेल : चंद्रशेखर बावनकुळे

नागपूर, पुढारी वृत्‍तसेवा : उद्धव ठाकरेंना यापुढे जाहीरसभेतून 'घरकोंबडा' म्हणावं लागेल कारण त्यांनी आता राजकारणाची सर्व पातळी सोडली आहे. देवेंद्र फडणवीस यांच्यावर केलेली टीका भाजप सहन करणार नाही असा इशारा भाजपचे प्रदेशाध्यक्ष चंद्रशेखर बावनकुळे यांनी दिला आहे.

देवेंद्र फडणवीस यांनी कायम महाराष्ट्राच्या हिताचा विचार केला, उद्धव जी, तुमच्या सारखं 'घरकोंबडा' बनून केवळ मातोश्रीची रखवाली केली नाही. तुम्ही स्वार्थासाठी सोनिया गांधींपुढे मुजरा केला पण देवेंद्र फडणवीस यांनी कुणाच्या पाठीत खंजीर खुपसला नाही. कोविडमध्ये महाराष्ट्र झुंजत असताना तुम्ही 'घरकोंबडा' होऊन फेसबुक लाईव्ह करत होतात.

तेव्हा देवेंद्र फडणवीस हे रुग्णालयात जाऊन लोकांना धीर देत होते. देवेंद्र फडणवीस हे सत्तेत असो की विरोधात कायम जनहिताचा विचार करतात. तुम्ही मात्र सत्तेत असताना शिवसैनिकांना वाऱ्यावर सोडून स्वतःच्या मुलाला मंत्री केले. आज मात्र सत्ता गेल्यामुळे जाग आली. पण लक्षात ठेवा जनता येणाऱ्या निवडणुकीत तुम्हाला धडा शिकविल्याशिवाय राहणार नाही असे बावनकुळे म्हणाले.