Pakistan train blast
क्वेटा: पाकिस्तानमधील बलुचिस्तान प्रांतात आज (दि. २४) सकाळी भीषण दहशतवादी हल्ला झाला. क्वेटा लष्करी छावणी येथून निघालेल्या एका प्रवासी ट्रेनला लक्ष्य करून करण्यात आलेल्या आत्मघाती बॉम्बस्फोटात २४ पाकिस्तानी सैनिक ठार झाले असून, १०० हून अधिक जण गंभीर जखमी झाले आहेत. 'बलुच लिबरेशन आर्मी' या संघटनेने या भीषण हल्ल्याची जबाबदारी स्वीकारली आहे.
क्वेटा लष्करी छावणीतून प्रवाशांना घेऊन निघालेली ही ट्रेन अवघ्या काही अंतरावर असणाऱ्या 'चमन फाटक'जवळ पोहोचली असता, एका वाहनाच्या साहाय्याने हा शक्तिशाली आयईडी स्फोट घडवून आणण्यात आला. या ट्रेनमधून पाकिस्तान लष्कराचे ३०० हून अधिक जवान प्रवास करत होते. त्यांनाच लक्ष्य करून हा हल्ला करण्यात आल्याचे समोर येत आहे.
हा स्फोट इतका शक्तिशाली होता की, ट्रेनची एक बोगी पूर्णपणे उद्ध्वस्त झाली असून इतर तीन बोगी रुळावरून घसरल्या. स्फोटानंतर ट्रेनला भीषण आग लागली. रेल्वेची बोगी पूर्णपणे जळून कोळसा झाल्याचे दिसत आहे. या स्फोटाच्या तीव्रतेमुळे रेल्वे ट्रॅकच्या आजूबाजूला असलेल्या घरांचे आणि वाहनांचेही मोठे नुकसान झाले आहे.
घटनेची माहिती मिळताच स्थानिक नागरिक आणि आपत्कालीन यंत्रणांनी घटनास्थळी धाव घेत बचावकार्य सुरू केले. सर्व जखमींना तातडीने क्वेटा येथील सिव्हिल रुग्णालय आणि लष्करी रुग्णालयात दाखल करण्यात आले आहे. सुरक्षा दलांनी संपूर्ण परिसराला वेढा घातला असून शोधमोहीम सुरू आहे. ढिगाऱ्याखाली अजूनही काही प्रवासी अडकले असण्याची शक्यता असल्याने मृतांचा आकडा आणखी वाढण्याची भीती वर्तवली जात आहे.
या हल्ल्यानंतर 'बलुच लिबरेशन आर्मी'च्या 'मजीद ब्रिगेड' या आत्मघाती पथकाने एका पत्रकाद्वारे या हल्ल्याची जबाबदारी स्वीकारली आहे. "क्वेटा कॅन्टोन्मेंटमधून सैन्याला घेऊन जाणाऱ्या ट्रेनला आमच्या फिदायीन पथकाने अत्यंत सुनियोजितपणे लक्ष्य केले," असे त्यांनी आपल्या निवेदनात म्हटले आहे. या कारवाईचा सविस्तर अहवाल आणि लष्कराचे झालेले नुकसान लवकरच जाहीर करू, अशी धमकीही बीएलएने दिली आहे. या हल्ल्यामुळे संपूर्ण पाकिस्तानात खळबळ उडाली असून बलुचिस्तानमधील सुरक्षा यंत्रणा हायअलर्टवर ठेवण्यात आल्या आहेत.
