osama bin laden son hamza video al qaeda 2019 death 25 year after 9-11 news
पुढारी ऑनलाईन : ओसामा बिन लादेनचा मुलगा हमजा बिन लादेन याचा नवा व्हिडिओ समोर आला आहे. अल-कायदाच्या मीडिया विंगने जवळपास ५० मिनिटांचा एक व्हिडिओ जारी केला आहे. या व्हिडिओमध्ये हमजासोबत अल-कायदाचा माजी प्रमुख अयमान अल-जवाहिरी यांची काही छायाचित्रेही दाखवण्यात आली आहेत.
९/११ हल्ल्यांच्या २५व्या वर्धापन दिनाच्या पार्श्वभूमीवर अल-कायदाच्या अधिकृत मीडिया विंग ‘अस-सहाब’ने हमजा बिन लादेनचा हा व्हिडिओ प्रदर्शित केला आहे. हमजा हा अल-कायदाचा संस्थापक ओसामा बिन लादेनचा मुलगा असून, त्याला संघटनेचा संभाव्य उत्तराधिकारी मानले जात होते.
विशेष म्हणजे, २०१९ मध्ये अफगाणिस्तान-पाकिस्तान सीमेजवळ अमेरिकेच्या दहशतवादविरोधी कारवाईत हमजा मारला गेल्याची माहिती समोर आली होती. मात्र, आता त्याचा नवा व्हिडिओ समोर आल्याने गुप्तचर क्षेत्रातील तज्ज्ञांचे लक्ष वेधले गेले आहे. या व्हिडिओमध्ये हमजाचे यापूर्वी सार्वजनिक न झालेले फुटेज दाखवण्यात आले आहे.
५० मिनिटांच्या व्हिडिओमध्ये अयमान अल-जवाहिरीची छायाचित्रेही
अल-कायदाने जारी केलेल्या या जवळपास ५० मिनिटांच्या व्हिडिओचे शीर्षक “११ सप्टेंबरच्या हल्ल्यांना २५ वर्षे” असे आहे. या व्हिडिओमध्ये मृत्यू झालेल्या अल-कायदा प्रमुख अयमान अल-जवाहिरी यांची यापूर्वी समोर न आलेली काही छायाचित्रेही दाखवण्यात आली आहेत.
मिळालेल्या माहितीनुसार, अल-कायदाने अद्याप जवाहिरीच्या मृत्यूची अधिकृतपणे पुष्टी केलेली नाही. तसेच संघटनेने त्याच्यासाठी पारंपरिक पद्धतीची अंतिम श्रद्धांजलीही प्रसिद्ध केलेली नाही.
हमजाला अशा प्रकारे दाखवण्यात आले
या व्हिडिओमध्ये हमजा अनेक वेळा दिसतो. त्याला एका जीर्ण झालेल्या मातीच्या भिंतीसमोर बसलेले दाखवण्यात आले आहे. त्याने पारंपरिक पांढरी पगडी परिधान केली असून, त्याच्या बाजूला असॉल्ट रायफल ठेवलेली दिसते.
गुप्तचर सूत्रांच्या माहितीनुसार, व्हिडिओची मांडणी अशा पद्धतीने करण्यात आली आहे की त्यातून अल-कायदाच्या वैचारिक भूतकाळाची आठवण करून दिली जाते.
एका सूत्राने सांगितले की, हमजाला अशा पद्धतीने दाखवण्यामागे दोन उद्देश असू शकतात. एक म्हणजे त्याला त्याच्या वडिलांचा उत्तराधिकारी म्हणून प्रस्थापित करणे आणि दुसरा म्हणजे सुरुवातीच्या जागतिक जिहादशी संबंधित पारंपरिक दृश्य ओळख पुन्हा समोर आणणे.
व्हिडिओची सुरुवातही धक्कादायक
विशेष म्हणजे, या व्हिडिओची सुरुवात कोणत्याही आंतरराष्ट्रीय कारवाईच्या फुटेजने होत नाही. सप्टेंबर २०१४ मध्ये कराचीतील नौदलाच्या डॉकयार्डवर अल-कायदा इन द इंडियन सबकॉन्टिनेंटने केलेल्या हल्ल्याच्या ऐतिहासिक फुटेजने व्हिडिओची सुरुवात होते.
गुप्तचर सूत्रांच्या मते, एखाद्या प्रादेशिक कारवाईला अशा प्रकारे सुरुवातीला महत्त्व देणे हे अल-कायदाच्या केंद्रीय नेतृत्वावर आणि त्याच्या प्रचार यंत्रणेवर पाकिस्तानी दहशतवाद्यांचा प्रभाव दर्शवते.
अल-कायदाच्या विद्यमान प्रमुखाच्या विचारसरणीचा प्रचार करण्याचा प्रयत्न
या व्हिडिओच्या माध्यमातून अल-कायदाचा विद्यमान प्रमुख सैफ अल-अद्ल याच्याशी संबंधित विचारसरणीचा प्रचार करण्याचा प्रयत्न केला जात असल्याचे सांगितले जात आहे.
तसेच, हमजाचे वडील ओसामा बिन लादेन यांच्या नावाचा वापर संघटनेत नव्या सदस्यांची भरती करण्याच्या उद्देशाने केला जात असल्याचेही या व्हिडिओच्या विश्लेषणातून समोर आले आहे.
