Israel attack on Iran
नवी दिल्ली: इस्रायल आणि अमेरिकेने शनिवारी इराणवर दिवसाढवळ्या प्रतिबंधात्मक हल्ला केला आहे. तेहरानमध्ये मोठ-मोठे स्फोटांचे आवाज ऐकू आले आहेत. इराणचे सर्वोच्च नेते अयातुल्ला अली खामेनी यांच्या कार्यालयांजवळ हा हल्ला झाला आहे. दरम्यान या हल्ल्यानंतर भारताने आपल्या नागरिकांसाठी मार्गदर्शक सुचना जारी केल्या आहेत.
इस्राईल मधील सध्याच्या सुरक्षा परिस्थितीच्या पार्श्वभूमीवर तेथील सर्व भारतीय नागरिकांनी सतर्क राहावे अशा सूचना देण्यात आल्या आहेत. आपले निवासस्थान किंवा कार्यस्थळाजवळील सुरक्षित आश्रयस्थळांची माहिती करून घ्यावी आणि शक्यतो त्यांच्याजवळच राहावे. पुढील आदेश येईपर्यंत इस्रायलमध्ये अनावश्यक प्रवास टाळावा. आपत्कालीन परिस्थितीत भारतीय नागरिकांनी भारतीय दूतावासाशी संपर्कात राहावे, अशा सूचना दिल्या आहेत.
इस्रायलने इराण विरोधात संभाव्य धोक्याला आळा घालण्यासाठी लष्करी कारवाई सुरू केल्याची माहिती इस्रायली संरक्षण मंत्र्यांनी दिली आहे. या कारवाईनंतर इस्रायलने देशभरातील नागरिकांसाठी अलर्ट जारी करत सायरन वाजवले, जेणेकरून संभाव्य प्रतिहल्ल्याच्या पार्श्वभूमीवर लोक सुरक्षित ठिकाणी जाऊ शकतील.
दरम्यान, इराणची राजधानी तेहरान येथे जोरदार स्फोट झाल्याच्या बातम्या स्थानिक माध्यमांनी दिल्या आहेत. राजधानीच्या मध्यवर्ती भागात किमान तीन स्फोट ऐकू आल्याचे प्रत्यक्षदर्शींनी सांगितले. मात्र, इराणी अधिकाऱ्यांनी अद्याप अधिकृतरीत्या हल्ल्याची माहिती दिली नाही किंवा नुकसानाबाबत तपशील दिलेला नाही.
