Israel Iran Conflict
तेहरान : इस्रायली संरक्षण इराणच्या दक्षिण पार्समधील पेट्रोकेमिकल प्रकल्पावर हल्ला केला आहे, अशी माहिती इस्रायलच्या संरक्षण मंत्र्यांनी आज (दि. ६ एप्रिल) दिली. इराणने या प्रकल्पावर हल्ला झाल्याचे सांगितल्यानंतर इस्रायल कॅट्झ यांनी स्पष्ट कले की, "इस्रायलने असलुयेह येथे असलेल्या इराणच्या सर्वात मोठ्या पेट्रोकेमिकल प्रकल्पावर मोठा हल्ला केला आहे. हे एक प्रमुख लक्ष्य असून, इराणच्या सुमारे ५०% पेट्रोकेमिकल उत्पादन येथे होते."
दक्षिण पार्समधील नैसर्गिक वायू क्षेत्राला लक्ष्य करण्यात आल्यानंतर प्रत्युत्तर म्हणून इराणने इस्रायल आणि त्याच्या आखाती अरब शेजारी देशांवर क्षेपणास्त्रे डागली. दरम्यान, अमेरिकेचे अध्यक्ष डोनाल्ड ट्रम्प यांनी तेहरानला होर्मुझची सामुद्रधुनी पुन्हा उघडण्यासाठी दिलेली अंतिम मुदत जवळ येत असताना, मध्यस्थांनी एक नवीन युद्धविराम प्रस्ताव प्रसारित केला आहे.
इराण आणि अमेरिकेला रविवारी रात्री उशिरा ४५ दिवसांच्या युद्धविरामाचा आणि होर्मुझची सामुद्रधुनी पुन्हा उघडण्याचा प्रस्तावाचा मसुदा प्राप्त झाला, असे वृत्त मध्य-पूर्व अधिकाऱ्यांच्या हवाल्याने 'द असोसिएटेड प्रेस'ला दिले आहे. हा प्रस्ताव इजिप्त, पाकिस्तान आणि तुर्कीच्या मध्यस्थांकडून आला आहे, ज्यांना आशा आहे की ४५ दिवसांची मुदत कायमस्वरूपी युद्धविरामावर चर्चा करण्यासाठी पुरेसा वेळ देईल.
अमेरिकेचे राष्ट्राध्यक्ष डोनाल्ड ट्रम्प यांनी रविवारी आपला इशारा अधिक तीव्र केला आहे की, जर इराणच्या सरकारने मंगळवारच्या मुदतीपर्यंत होर्मुझची सामुद्रधुनी पुन्हा उघडली नाही, तर तेथील महत्त्वाच्या पायाभूत सुविधांवर जोरदार हल्ला चढवला जाईल. तर धमकीला निर्णायक प्रत्युत्तर दिले जाईल, असे इराणच्या उप परराष्ट्र मंत्र्यांनी स्पष्ट केले होते.
