Abu Dhabi Flying Taxi Driverless Electric Air Taxi Archer Aviation UAE Midnight eVTOL
अबूधाबी : अबूधाबीने शहर वाहतुकीत क्रांती घडविणाऱ्या पहिल्या ड्रायव्हरलेस (स्वयंचलित) इलेक्ट्रिक एअर टॅक्सीच्या यशस्वी चाचणी उड्डाणाची घोषणा केली आहे. 2026 च्या सुरुवातीस ही सेवा सामान्य नागरिकांसाठी उपलब्ध होणार असल्याची माहिती देण्यात आली आहे.
अमेरिकास्थित Archer Aviation या कंपनीने या प्रकल्पाची अंमलबजावणी केली असून, अबूधाबी हे त्यांचे पहिले आंतरराष्ट्रीय प्रक्षेपण स्थळ ठरणार आहे.
या एअर टॅक्सीचे चाचणी उड्डाण अबूधाबीतील अल बतीन एक्झिक्युटिव्ह एअरपोर्ट येथे पार पडले. चाचणीदरम्यान Midnight eVTOL (Electric Vertical Take-Off and Landing) हे पूर्णपणे विजेवर चालणारे आणि शून्य प्रदूषण करणारे विमान शहराच्या आकाशात उडताना दिसले.
Gulf News च्या अहवालानुसार, या चाचण्या विशेषतः युएईतील उष्ण हवामान, जास्त आर्द्रता आणि धूळ यासारख्या परिस्थितींमध्ये पार पडणार आहेत.
ही टॅक्सी विशेषतः शहरांतील अल्प पल्ल्याच्या प्रवासासाठी म्हणजे विमानतळ ते शहराचे केंद्र अशी वाहतूक सोपी करण्यासाठी डिझाईन करण्यात आली आहे.
Khaleej Times ने स्पष्ट केले आहे की ही सेवा केवळ श्रीमंत किंवा लक्झरी प्रवाशांसाठी नाही, तर सामान्य जनतेसाठीही किफायतशीर दरात उपलब्ध होणार आहे. त्यामुळे भविष्यात एअर टॅक्सी ही सामान्य शहरवासीयांसाठीही एक व्यवहार्य पर्याय ठरू शकते.
ही टॅक्सी रस्त्यांवरील गर्दी कमी करेल, प्रवासाचा कालावधी घटवेल आणि पारंपरिक वाहनांपेक्षा अधिक शांत व पर्यावरणपूरक असेल. याशिवाय, भविष्यात अशा eVTOLsचा वापर शोध व बचाव मोहीमांमध्ये करण्याची शक्यता आहे.
दुर्गम भागात, जसे की वाडी नकाब किंवा जेबेल जैस येथे पारंपरिक हेलिकॉप्टर पोहोचू शकत नाहीत, तेथे ही टॅक्सी अत्यंत उपयुक्त ठरू शकते.
अबूधाबीच्या या यशापूर्वी दुबईमध्ये Joby Aviation या कंपनीने ३० जून रोजी अशाच प्रकारच्या एअर टॅक्सीचे यशस्वी चाचणी उड्डाण केले होते. दोन्ही सेवा २०२६च्या सुरुवातीला व्यावसायिक स्वरूपात सुरू होतील, अशी अपेक्षा आहे.
