Fatal Car Fire Goa
पणजी : गोव्यातील बांबोळी परिसरातील 'फुलांचो खुरिस'जवळ शनिवारी (दि.१) पहाटे झालेल्या भीषण अपघातात एका तरुणाचा कारमध्ये होरपळून मृत्यू झाला, तर अन्य दोघेजण गंभीर जखमी झाले. अपघातानंतर कारने पेट घेतल्याने ही दुर्घटना अधिक भीषण ठरली.
मिळालेल्या माहितीनुसार, पहाटेच्या सुमारास पणजीहून मडगावच्या दिशेने जाणारी कार राष्ट्रीय महामार्गावरून वेगाने जात होती. शिरदोण परिसरात चालकाचे वाहनावरील नियंत्रण सुटल्याने कारने प्रथम महामार्गावरील क्रॅश बॅरियरला जोरदार धडक दिली. त्यानंतर कार सेवा रस्त्यावर जाऊन आदळली.
धडकेनंतर कारच्या इंजिनमधून अचानक आग भडकली आणि काही क्षणांतच संपूर्ण वाहन आगीच्या भक्ष्यस्थानी पडले. कारमध्ये त्यावेळी तीन तरुण प्रवास करत होते. आगीच्या ज्वाळा आणि दाट धुरामुळे त्यांच्यात एकच गोंधळ उडाला.
या दुर्घटनेत एका तरुणाला कारमधून बाहेर पडता न आल्याने त्याचा जागीच होरपळून मृत्यू झाला. स्थानिक नागरिक आणि बचाव पथकाच्या मदतीने अन्य दोघांना वेळीच कारमधून बाहेर काढण्यात आले. मात्र, त्यांना गंभीर दुखापत झाल्याने उपचारासाठी रुग्णालयात दाखल करण्यात आले आहे.
अपघातानंतर काही काळ महामार्गावरील वाहतुकीवर परिणाम झाला. या भीषण दुर्घटनेमुळे परिसरात हळहळ व्यक्त होत असून, अपघाताचे नेमके कारण शोधण्यासाठी संबंधित यंत्रणांनी तपास सुरू केला आहे.
