Whatsapp Account Under Review Issue: लोकप्रिय मेसेजिंग अॅप WhatsApp वापरणाऱ्या अनेक युजर्सना सोमवारी रात्री अचानक तांत्रिक अडथळा आला. भारतासह विविध देशांतील अनेक युजर्सची WhatsApp खाती 24 तासांसाठी 'Under Review' (पडताळणीअंतर्गत) ठेवण्यात आली. यामुळे संबंधित युजर्सना WhatsApp वरील जवळपास सर्व सुविधा वापरता आल्या नाहीत. या घटनेनंतर अनेक युजर्सनी सोशल मीडियावर पोस्ट करत आपली नाराजी व्यक्त केली. कोणतीही पूर्वसूचना न देता खाते बंद करण्यात आल्याचा दावा युजर्सनी केला.
सोमवारी रात्री सुमारे 8 वाजल्यापासून अनेक युजर्सच्या WhatsApp खात्यावर "Your account is under review" असा मेसेज दिसू लागला. त्यानंतर मेसेज पाठवणे, कॉल करणे किंवा इतर फीचर्स वापरता येत नव्हते. यामुळे अनेक युजर्समध्ये संभ्रमाचे वातावरण निर्माण झाले.
या प्रकरणावर प्रतिक्रिया देताना WhatsApp च्या प्रवक्त्यांनी सांगितले की, कंपनी आपल्या प्लॅटफॉर्मचा गैरवापर रोखण्यासाठी सातत्याने काम करत असते आणि संशयास्पद खात्यांवर कारवाई केली जाते.
मात्र, काही वेळा चुकूनही काही खाती पुनरावलोकनासाठी (Review) ठेवली जाऊ शकतात. अशा वेळी कंपनी शक्य तितक्या लवकर समस्या सोडवून संबंधित युजर्सचे खाते पुन्हा सुरू करण्याचा प्रयत्न करते.
सध्या काही युजर्सच्या खात्यांचे पुनरावलोकन सुरू असून, अनेकांचे 24 तासांनंतर खाते पुन्हा सुरू होऊ शकते, अशी माहिती समोर येत आहे. मात्र, WhatsApp कडून या घटनेचे नेमके कारण अद्याप स्पष्ट करण्यात आलेले नाही.
तज्ज्ञांच्या मते, जर तुमचे WhatsApp खातेही Under Review मध्ये गेले असेल, तर घाबरण्याची गरज नाही. कोणतेही अनधिकृत अॅप वापरणे टाळावे, WhatsApp चे अधिकृत अॅपच वापरावे आणि पुनरावलोकन पूर्ण होईपर्यंत वाट पाहावी. सध्या या तांत्रिक अडचणीचे मूळ कारण शोधण्याचे काम सुरू असून, WhatsApp लवकरच याबाबत अधिकृत स्पष्टीकरण देण्याची शक्यता आहे.
