Indori Poha recipe
सकाळचा नाश्ता हा दिवसाची सर्वात महत्त्वाची सुरुवात असते. जर सकाळी काहीतरी आरोग्यदायी, चविष्ट आणि झटपट तयार होणारे खायला मिळाले, तर पूर्ण दिवस उत्साहात जातो. अशावेळी 'इंदोरी पोहे' हा एक उत्तम पर्याय ठरतो. आपल्या खास चवीसाठी प्रसिद्ध असलेले हे पोहे कांदा, हिरवी मिरची, शेंगदाणे, इंदोरी शेव आणि डाळिंबाच्या दाण्यांनी सजवला जातो. हलका असल्याने तो पचायला सोपा असतो आणि बराच वेळ पोट भरलेले ठेवतो.
आवश्यक साहित्य:
पोहे: २ कप जाड पोहे
भाज्या: १ मध्यम कांदा (बारीक चिरलेला), हिरव्या मिरच्या, कढीपत्ता
फोडणीसाठी: २ चमचे तेल, अर्धा चमचा मोहरी, बडीशेप, हळद
चवीसाठी: जिरावन मसाला, १ चमचा साखर, मीठ, लिंबाचा रस
सजावटीसाठी: तळलेले शेंगदाणे, कोथिंबीर, इंदोरी शेव आणि डाळिंबाचे दाणे
१. सर्वप्रथम पोहे एका चाळणीत घेऊन स्वच्छ पाण्याने हलक्या हाताने धुवून घ्या. लक्षात ठेवा, पोहे पाण्यात भिजवून ठेवू नका, फक्त ओले करा. त्यात मीठ आणि १ चमचा साखर मिसळून १०-१५ मिनिटे बाजूला ठेवा. यामुळे पोहे छान सुटसुटीत होतात.
२. कढईत २ चमचे तेल गरम करा. त्यात अर्धा कप शेंगदाणे सोनेरी होईपर्यंत तळून एका प्लेटमध्ये काढून घ्या.
३. त्याच उरलेल्या तेलात मोहरी, बडीशेप आणि कढीपत्ता टाका. मोहरी तडतडली की त्यात बारीक चिरलेला कांदा आणि हिरवी मिरची घालून कांदा पारदर्शक होईपर्यंत परता. त्यानंतर अर्धा चमचा हळद घाला.
४. आता भिजवलेले पोहे कढईत घालून हलक्या हाताने मिक्स करा. कढईवर झाकण ठेवून २-३ मिनिटे मंद आचेवर वाफ येऊ द्या.
५. गॅस बंद करून वरून लिंबाचा रस आणि कोथिंबीर टाका. पोहे प्लेटमध्ये काढल्यानंतर त्यावर तळलेले शेंगदाणे, जिरावन मसाला, कुरकुरीत इंदोरी शेव आणि डाळिंबाचे दाणे घालून गरमागरम सर्व्ह करा.
