Bhiwandi Crime News
भिवंडी (ठाणे) : शहरातील खाडी लगतच्या ईदगाह झोपडपट्टी जवळील दलदलीत ३० ऑगस्ट रोजी धडा वेगळ्या आढळलेल्या महिलेचे शिर आढळून आल्यानंतर या महिलेची हत्या केलेल्या गुन्ह्याचा उलगडा करण्यात स्थानिक भोईवाडा पोलिसांना यश मिळाले आहे. पोलिसांनी अवघ्या २४ तासात हत्या झालेल्या महिलेची ओळख पटवून ४८ तासात हत्या करणाऱ्या पतीस अटक करण्यात यश मिळवले आहे. परवीन उर्फ मुस्कान वय २६ असे हत्या झालेल्या महिलेचे नाव असून या गुन्ह्यात पती तहा इम्तियाज अन्सारी या अटक केली आहे.
पोलिसांनी दिलेल्या माहितीनुसार खाडी लगतच्या दलदलीत ३० ऑगस्ट रोजी धडा वेगळे महिलेचे शिर आढळल्याने एकच खळबळ उडाली होती. तर महिलेची ओळख पटवणे व त्यानंतर हत्येचा आरोपी पकडणे असे मोठे आव्हान भोईवाडा पोलिसांसमोर होते.
भोईवाडा पोलिस ठाण्याचे वरिष्ठ पोलिस निरीक्षक अशोक रत्नपारखी यांसह वरिष्ठांच्या मार्गदर्शनाखाली पोलिस निरीक्षक प्रमोद कुंभार व त्यांच्या पोलिस पथकातील पोलिसांनी ईदगाह झोपडपट्टीत माहिती घेण्यास सुरवात केली. त्यामध्ये येथील एक महिला दिसत नसल्याबद्दल माहिती समोर आली. त्यामुळे पोलिसांनी तपासाची दिशा निश्चित करीत चौकशीस सुरवात केली. त्यामध्ये परवीन उर्फ मुस्कान या महिलेचा तो मृतदेह असल्याचे स्पष्ट झाले. त्यानंतर माहिती घेतली असता तिचा चालक पती घरी नसल्याचे आढळून आले.
पोलिसांनी शोध घेत त्यास १ सप्टेंबर रोजी सायंकाळी ताब्यात घेऊन कसून चौकशी सुरू केली. त्यानंतर पती तहा याने पत्नीच्या हत्येची कबुली दिली आहे. पोलिसांनी त्यास घटनास्थळी नेऊन हत्या केलेल्या पत्नीचे धड कोठे आहे. त्याबाबत शोध घेण्यासाठी खाडी पात्रात बोटीच्या सहाय्याने शोध घेण्याचा प्रयत्न केला.
दोघा पती-पत्नीमध्ये एकमेकांच्या वैयक्तिक संशयावरून वाद होत असत. त्यामुळे त्यांच्यात हाणामारी सुद्धा होत असे. त्यातून परवीन ही २८ ऑगस्टरोजी सुद्धा घरातून निघून गेली होती. त्यातून वाद झाला होता. त्या रागातून पती तहा इम्तियाज अन्सारी याने २९ ऑगस्ट रोजी पत्नी परवीन हिची क्रूरपणे हत्या केली. त्यावेळी त्याने पत्नीचे शिर धडापासून वेगळे करीत शरीराचे दोन तुकडे करीत ते खाडीत भरतीचे पाणी वाढले असताना त्यात फेकून पुरावा नष्ट करण्याचा प्रयत्न केला होता.
आरोपी पतीला 11 सप्टेंबर पर्यंत पोलीस कोठडी
मंगळवारी (दि.2) घटनास्थळी स्थानिक पोलिसांसह फॉरेन्सिक पथक व श्वान पथकास पाचारण करून शोध घेण्याचा प्रयत्न केला आहे. पण अजून ही धड आढळून न आल्याने खाडी लगतच्या पोलिस ठाणे यांना पत्राद्वारे या बाबत कळविण्यात आले आहे. दरम्यान आरोपी पती तहा इम्तियाज अन्सारी या भिवंडी न्यायालयात हजर केले असता त्यास ११ सप्टेंबरपर्यंत पोलिस कोठडी ठोठावण्यात आली आहे.
