Stock Market Today: देशांतर्गत शेअर बाजारात आजचा दिवस सकारात्मक सुरू झाला असला, तरी वीकली एक्सपायरीमुळे बाजारात मोठ्या प्रमाणावर चढ-उतार (व्होलॅटिलिटी) दिसून येत आहेत. GIFT निफ्टीत सुमारे 70-100 अंकांची वाढ दिसल्याने बाजार उघडताना तेजीचा अंदाज व्यक्त करण्यात आला होता. मात्र जागतिक घडामोडी, कच्च्या तेलाच्या किमतीतील बदल आणि परदेशी गुंतवणूकदारांची सततची विक्री यामुळे बाजारात थोडी अस्थिरता आहे.
सलग तीन दिवसांच्या वाढीनंतर ब्रेंट क्रूडमध्ये मोठी घसरण झाली. 106 डॉलरच्या वर गेलेले तेलाचे दर घसरून 100 डॉलरच्या आसपास आले, सध्या ते 102 डॉलरच्या आसपास ट्रेड करत आहेत. भारतासारख्या आयात-आधारित देशासाठी ही घसरण सकारात्मक मानली जाते, ज्याचा बाजाराच्या सेंटिमेंटवरही सकारात्मक परिणाम होऊ शकतो.
अमेरिकन बाजारात चार दिवसांच्या घसरणीनंतर जोरदार रिकव्हरी झाली आहे. डाओ जोन्समध्ये सुमारे 400 अंकांची वाढ झाली, तर नॅस्डॅकमध्ये 270 अंकांची तेजी होती. टेक आणि कंझ्युमर स्टॉक्समध्ये खरेदी वाढल्याने ही तेजी पाहायला मिळाली.
स्ट्रेट ऑफ हॉर्मुज परिसरात तणाव कायम आहे. अमेरिका, युरोप आणि मध्यपूर्वेतील देशांमधील वक्तव्यांमुळे अनिश्चितता वाढली आहे. भारताने मात्र संतुलित भूमिका घेत स्पष्ट केले की, या क्षेत्रात युद्धनौका तैनात करण्याबाबत अमेरिकेसोबत कोणतीही चर्चा झालेली नाही.
परदेशी संस्थागत गुंतवणूकदार (FII) सलग 12व्या दिवशी विक्री करत आहेत. त्यांनी सुमारे 9,366 कोटी रुपयांची विक्री केली आहे. याउलट, देशांतर्गत गुंतवणूकदार (DII) बाजाराला आधार देत असून त्यांनी 12,593 कोटी रुपयांची खरेदी केली आहे.
आज Sagar Cements या कंपनीवर गुंतवणूकदारांचे लक्ष असेल. Andhra Cements OFS च्या माध्यमातून 7.25 टक्के हिस्सा विकणार असून त्याची फ्लोर प्राइस 52 रुपये ठेवण्यात आली आहे.
एकूणच, बाजारात सुरुवातीला तेजीचे संकेत असले तरी वीकली एक्सपायरी, जागतिक अनिश्चितता आणि FII विक्रीमुळे बाजारात मोठे चढ-उतार होण्याची शक्यता आहे. गुंतवणूकदारांनी सावध भूमिका घेऊन महत्त्वाच्या जागतिक संकेतांवर लक्ष ठेवणे गरजेचे आहे.
