Stock Market Today: आठवड्याच्या शेवटच्या व्यवहाराच्या दिवशी भारतीय शेअर बाजाराची सुरुवात मोठ्या घसरणीसह झाली. शुक्रवारी निफ्टी 203 अंकांनी घसरून 23,666 वर, तर सेन्सेक्स 683 अंकांनी घसरून 75,708 वर उघडला.
बँक निफ्टीतही जवळपास 0.75 टक्क्यांची घसरण झाली असून तो 56,169 वर व्यवहार करत होता. बाजार उघडताच गुंतवणूकदारांना मोठा फटका बसला. बीएसईमध्ये लिस्टेड कंपन्यांचे एकूण मार्केट कॅप सुमारे 3.5 लाख कोटींनी घटून 473.34 लाख कोटींवर आले.
गुरुवारी निफ्टी 126 अंकांच्या घसरणीसह 23,869 वर बंद झाला होता. याआधीच्या चारही व्यवहार सत्रांमध्ये बाजार लाल रंगात बंद झाला होता. त्यामुळे या आठवड्यात सलग पाचव्या दिवशी बाजारावर विक्रीचा दबाव कायम राहिल्याचे दिसून आले.
सेन्सेक्समधील 30 शेअर्सपैकी केवळ HCL Tech, Tech Mahindra आणि TCS हे शेअर्स वाढीसह व्यवहार करत होते. तर Eternal, IndiGo आणि Bharti Airtel यांसह उर्वरित बहुतांश शेअर्समध्ये घसरण झाली.
सेक्टोरल निर्देशांकांमध्ये IT निर्देशांकच हिरव्या रंगात होता. त्यात सुमारे 0.5 टक्क्यांची वाढ दिसून आली. मात्र ऑटो, बँकिंग, वित्तीय सेवा आणि इतर प्रमुख क्षेत्रांमध्ये विक्रीचा दबाव कायम होता.
तज्ज्ञांच्या मते, इराण आणि अमेरिकेमधील वाढता तणाव आणि कच्च्या तेलाच्या पुरवठ्याबाबत निर्माण झालेली अनिश्चितता यामुळे गुंतवणूकदारांमध्ये चिंता वाढली आहे. कच्च्या तेलाच्या किमती 100 डॉलर प्रति बॅरलच्या पुढे गेल्याने महागाई आणि जागतिक अर्थव्यवस्थेबाबतची भीती वाढली आहे. याशिवाय कृत्रिम बुद्धिमत्ता (AI) क्षेत्रातील शेअर्समध्ये पुन्हा विक्रीचा दबाव दिसून आल्याने अमेरिकेसह आशियाई बाजारांमध्येही घसरण दिसून आली.
भारतीय बाजारासोबतच आशियातील प्रमुख शेअर बाजारांमध्येही मोठी घसरण झाली.
जपानचा निक्केई सुमारे 3 टक्के घसरला.
दक्षिण कोरियाचा कोस्पी जवळपास 3.9 टक्के खाली आला.
तैवानचा प्रमुख निर्देशांक 1.2 टक्क्यांनी घसरला.
अमेरिकन बाजारातही गुरुवारी डाओ जोन्स 506 अंकांनी, तर नॅस्डॅकमध्ये 2 टक्क्यांहून अधिक घसरण झाली होती.
बाजारातील घसरणीमागे अनेक घटक कारणीभूत असल्याचे मानले जात आहे.
कच्च्या तेलाच्या किमतींमध्ये वाढ
पुरवठा साखळीवर निर्माण झालेला धोका
इराण-अमेरिका तणाव कायम
रुपया पुन्हा विक्रमी नीचांकी पातळीच्या जवळ
डॉलर निर्देशांक आणि अमेरिकन बाँड यिल्डमध्ये वाढ
जागतिक बाजारातील घसरण
मिडकॅप आणि स्मॉलकॅप शेअर्समधील मोठी विक्री
काही तांत्रिक विश्लेषकांच्या मते, मोठ्या घसरणीनंतर बाजार महत्त्वाच्या सपोर्ट झोनच्या जवळ पोहोचला आहे. त्यामुळे अल्पकालीन तांत्रिक वाढ (Technical Bounce) मिळण्याची शक्यता नाकारता येत नाही.
HDFC Securities चे तांत्रिक विश्लेषक नागराज शेट्टी यांच्या मते, 23,700 ते 23,650 हा निफ्टीसाठी महत्त्वाचा सपोर्ट झोन आहे. या पातळीवरून बाजारात काही प्रमाणात सुधारणा होऊ शकते. मात्र निफ्टीसाठी 24,000 ही महत्त्वाची प्रतिकार (Resistance) पातळी राहील. कच्च्या तेलाच्या वाढत्या किमती आणि इराण-अमेरिका संघर्ष कायम राहिल्यास बाजारातील अस्थिरता लवकर कमी होण्याची शक्यता कमी असल्याचेही त्यांनी नमूद केले.
