Rahul Gandhi Reacts to PM Modi's NEET Video: NEET पेपर लीक प्रकरणावर पंतप्रधान नरेंद्र मोदी यांनी रात्री उशिरा विद्यार्थ्यांना उद्देशून व्हिडिओ शेअर केल्यानंतर राजकीय वातावरण तापले आहे. या व्हिडिओवर प्रतिक्रिया देताना काँग्रेस नेते राहुल गांधी यांनी केंद्र सरकारवर जोरदार टीका केली असून केंद्रीय शिक्षणमंत्री धर्मेंद्र प्रधान यांचा तातडीने राजीनामा घेण्याची मागणी केली आहे.
राहुल गांधी यांनी सोशल मीडिया प्लॅटफॉर्म X वर पोस्ट करत म्हटले की, "श्री. मोदीजी, आमचे विद्यार्थी धर्मेंद्र प्रधान यांच्या राजीनाम्याची मागणी करत आहेत. मध्यरात्री हा व्हिडिओ शेअर करून विद्यार्थ्यांच्या बुद्धिमत्तेचा अपमान करू नका."
त्यांनी पुढे सरकारसमोर तीन प्रमुख मागण्या ठेवल्या आहेत.
धर्मेंद्र प्रधान यांना पदावरून हटवा.
विद्यार्थ्यांवर मारहाण करणाऱ्यांवर कठोर कारवाई करा.
विद्यार्थ्यांची जाहीर माफी मागा.
पंतप्रधान नरेंद्र मोदी यांनी NEET पेपर लीक प्रकरण आणि विद्यार्थ्यांच्या चिंतेच्या पार्श्वभूमीवर व्हिडिओ शेअर केला होता. या व्हिडिओनंतर काँग्रेसने सरकारच्या भूमिकेवर प्रश्न उपस्थित करत अधिक ठोस कारवाईची मागणी केली आहे. राहुल गांधी यांनी सरकारने केवळ संदेश देण्यापेक्षा प्रत्यक्ष कृती करून विद्यार्थ्यांचा विश्वास संपादन करावा, असेही सूचित केले.
NEET पेपर लीक प्रकरणावरून देशभरात आंदोलन सुरू असून शिक्षण व्यवस्थेतील पारदर्शकता, परीक्षेतील सुरक्षेचे प्रश्न आणि विद्यार्थ्यांच्या भवितव्याबाबत चिंता व्यक्त केली जात आहे. विरोधी पक्षांकडून या प्रकरणात केंद्र सरकारवर सातत्याने टीका केली जात आहे.
