Stock Market Today: आठवड्याच्या सुरुवातीपासून सुरू असलेली घसरण आजच्या व्यवहारातही दिसून आली. निफ्टी जवळपास सपाट पातळीवर 24,472 वर उघडला; मात्र सुरुवातीच्या व्यवहारात तो घसरून 24,400च्या आसपास पोहोचला. सेन्सेक्समध्येही 225 अंकांहून अधिक घसरण झाली असून तो 78,000च्या खाली आला.
बाजारातील या दबावामागे सध्या कच्च्या तेलाच्या वाढत्या किमती हा महत्त्वाचा घटक मानला जात आहे. क्रूड ऑइलचा भाव सध्या 90 डॉलरच्या आसपास आहे. त्याचा परिणाम भारताच्या महागाईवर आणि अर्थव्यवस्थेवर होण्याची शक्यता असल्याने गुंतवणूकदार सावध झाले आहेत.
दरम्यान, रुपयाने आज थोडी सुधारणा केली. डॉलरच्या तुलनेत रुपया 4 पैशांनी मजबूत होऊन 95.40 या पातळीवर उघडला. मंगळवारी निफ्टीमध्ये 112 अंकांची घसरण झाली होती आणि तो 24,471 वर बंद झाला होता.
आज भारत आणि अमेरिकेतील जुलै महिन्याचे किरकोळ महागाईचे आकडे जाहीर होणार आहेत. त्यामुळे या आकडेवारीकडे गुंतवणूकदारांचे लक्ष लागले आहे.
RBIचे गव्हर्नर संजय मल्होत्रा यांनी MPCच्या बैठकीनंतर महागाईबाबतची चिंता काही प्रमाणात कमी झाल्याचे संकेत दिले होते. त्यामुळे आज जाहीर होणारे महागाईचे आकडे बाजाराची पुढील दिशा ठरवण्यासाठी महत्त्वाचे ठरू शकतात.
कच्च्या तेलाचा भाव 90 डॉलरच्या आसपास असूनही परदेशी संस्थात्मक गुंतवणूकदारांकडून मोठ्या प्रमाणात विक्री होत नसल्याने बाजारासाठी हा सकारात्मक संकेत मानला जात आहे. याशिवाय गेल्या आठवड्यापासून इराण-अमेरिकेदरम्यान हल्ले थांबले आहेत.
बहुतेक कंपन्यांचे तिमाही निकाल चांगले आहेत. थेट कर संकलनाचे आकडेही चांगले आहेत. जुलै महिन्यातील म्युच्युअल फंडांची आकडेवारीही बाजारासाठी सकारात्मक असल्याचे मानले जात आहे.
दुसरीकडे कच्च्या तेलाच्या किमतीत सलग पाच दिवस वाढ झाली आहे. त्यामुळे महागाईचा धोका पुन्हा वाढण्याची शक्यता आहे.
अमेरिकन बाजारांमध्येही काही प्रमाणात विक्रीचा दबाव आहे. इराण-अमेरिका चर्चेत अद्याप तोडगा निघालेला नाही आणि स्ट्रेट ऑफ होर्मुजचा मुद्दाही कायम आहे.
रुपयावर पुन्हा दबाव वाढत आहे. त्याचबरोबर VIXमधील घसरणीला ब्रेक लागला आहे. IPO, OFS, QIP आणि मोठ्या ब्लॉक डील्समुळे बाजारात मोठ्या प्रमाणावर निधीची मागणी निर्माण होत असल्याने त्याचाही परिणाम बाजारावर होऊ शकतो.
जियोजीत इन्व्हेस्टमेंट लिमिटेडचे रिसर्च प्रमुख विनोद नायर यांच्या मते, कच्च्या तेलाच्या किमतीत झालेली मोठी वाढ हे मंगळवारच्या विक्रीचं प्रमुख कारण होतं.
क्रूडच्या वाढत्या किमतीमुळे महागाईचा धोका वाढतो. त्यातच स्ट्रेट ऑफ होर्मुजमधून तेलपुरवठ्याबाबत अनिश्चितता कायम आहे. भारत आणि अमेरिकेतील महागाईचे आकडेही जाहीर होणार असल्याने गुंतवणूकदारांनी सावध भूमिका घेतली.
HDFC Securitiesचे टेक्निकल रिसर्च अॅनालिस्ट नागराज शेट्टी यांच्या मते, निफ्टीच्या दैनंदिन चार्टवर नकारात्मक कॅन्डल तयार झाली आहे. त्यामुळे बाजारात आणखी घसरण होण्याची शक्यता आहे.
त्यांच्या मते, 24,300 ही निफ्टीसाठी महत्त्वाची सपोर्ट पातळी आहे. त्यामुळे आगामी व्यवहारात निफ्टी ही पातळी टिकवते का, याकडे गुंतवणूकदारांचे लक्ष राहणार आहे.
एकूणच, कच्च्या तेलाच्या किमती, महागाईचे आकडे आणि अमेरिका-इराणमधील परिस्थिती हे सध्या भारतीय शेअर बाजारासाठी महत्त्वाचे ट्रिगर ठरणार आहेत.
