Stock Market Today: भारतीय शेअर बाजारात ऑगस्ट सिरीजच्या पहिल्याच सत्रात जोरदार तेजी पाहायला मिळाली. बुधवारी निफ्टी 191 अंकांच्या वाढीसह 24,176 वर, तर सेन्सेक्स 657 अंकांच्या वाढीसह 77,423 वर उघडला. या दमदार तेजीमुळे काही मिनिटांतच गुंतवणूकदारांच्या संपत्तीत तब्बल 2.5 लाख कोटींची वाढ झाली. त्यामुळे BSE वर लिस्टेड कंपन्यांचे एकूण बाजार भांडवल 481.65 लाख कोटींवर पोहोचले.
बाजार विश्लेषकांच्या मते, नव्या सिरीजच्या पहिल्या दिवशी बाजारात तेजी दिसण्याची परंपरा आहे. गेल्या 10 सिरीजपैकी 9 वेळा निफ्टीने पहिल्या सत्रात सकारात्मक कामगिरी केली आहे, तर बँक निफ्टीने 10 पैकी 8 वेळा वाढ नोंदवली आहे.
जुलै सिरीजच्या शेवटच्या दिवशी निफ्टी 10 अंकांच्या किरकोळ घसरणीसह 23,985 वर बंद झाला होता. मात्र संपूर्ण जुलै सिरीजमध्ये निफ्टीत 119 अंकांची वाढ, तर बँक निफ्टीत 787 अंकांची घसरण झाली होती.
अमेरिकन फेडरल रिझर्व्हची बैठक आजपासून सुरू होत असून व्याजदर आणि महागाईवरील निर्णयाकडे जगभरातील गुंतवणूकदारांचे लक्ष लागले आहे.
AI आणि चिप क्षेत्रातील शेअर्समध्ये घसरण सुरूच असून दक्षिण कोरियाचा KOSPI आणि जपानचा निक्केई निर्देशांक दबावाखाली आहे.
इराण-अमेरिका तणाव पुन्हा वाढल्याने कच्च्या तेलाच्या किमतीत 4 टक्क्यांहून अधिक वाढ झाली असून ब्रेंट क्रूड 88 डॉलर प्रति बॅरलच्या जवळ पोहोचला आहे.
मंगळवारी परदेशी संस्थात्मक गुंतवणूकदारांनी (FII) रोख बाजारात ₹755 कोटींची, तर देशांतर्गत संस्थात्मक गुंतवणूकदारांनी (DII) ₹1,664 कोटींची खरेदी केली.
जागतिक घडामोडींमुळे बाजारात अस्थिरता कायम राहण्याची शक्यता आहे.
अमेरिकेच्या सेंट्रल कमांडच्या माहितीनुसार, इराणच्या रिव्होल्युशनरी गार्डने मध्यपूर्वेतील अनेक अमेरिकन लष्करी तळांवर बॅलिस्टिक क्षेपणास्त्रांनी हल्ला केला. अमेरिकेने सर्व क्षेपणास्त्रे हवेतच निष्प्रभ केल्याचा दावा केला आहे. या घटनेनंतर कच्च्या तेलाच्या किमतीत मोठी वाढ झाली असून त्याचा परिणाम जागतिक बाजारांवर दिसून येत आहे.
FII आणि DII कडून खरेदी
अमेरिकेतील डाऊ जोन्स निर्देशांकात जोरदार वाढ
रुपयात सलग दुसऱ्या दिवशी तेजी
AI क्षेत्रातील जागतिक घसरणीचा भारतीय आयटी कंपन्यांना फायदा होण्याची शक्यता
औद्योगिक उत्पादन निर्देशांक (IIP) 7.3 टक्क्यांवर, गेल्या 23 महिन्यांतील सर्वोच्च पातळी
एल अँड टीचे अपेक्षेपेक्षा चांगले तिमाही निकाल
इराण-अमेरिका तणाव अधिक तीव्र होण्याची शक्यता
कच्च्या तेलाच्या किमतीत मोठी अस्थिरता
निफ्टीचे रोलओव्हर अपेक्षेपेक्षा कमी
HDFC Securities चे तांत्रिक विश्लेषक नागराज शेट्टी यांच्या मते, निफ्टीचा अल्पकालीन कल सकारात्मक आहे. मात्र 24,100 हा महत्त्वाचा प्रतिकार स्तर असून या पातळीवर काही काळ बाजारात कन्सोलिडेशन दिसू शकते.
तर SAMCO Securities चे तांत्रिक विश्लेषक ओम मेहरा यांच्या मते, RSI सध्या 49 वर असल्याने बाजार न्यूट्रल स्थितीत आहे. तेजी कायम राहिल्यास 24,080 हा महत्त्वाचा प्रतिकार स्तर असेल. घसरण झाल्यास 23,900 हा पहिला आधार असून 23,606 हा मजबूत सपोर्ट मानला जात आहे.
