Stock Market Opening Updates
दोन दिवसांच्या घसरणीनंतर भारतीय शेअर बाजार गुरुवारी (दि.२९ मे) सावरला. सेन्सेक्स आणि निफ्टी तेजीसह खुले झाले आहेत. सुरुवातीच्या व्यवहारात सेन्सेक्स ४०० हून अधिक अंकांनी वाढून ८१,७०० वर पोहोचला. तर निफ्टी ५० अंकांच्या किरकोळ वाढीसह २४,८०० वर व्यवहार करत आहे.
आजच्या सत्रात आयटी शेअर्स वाढले आहेत. निफ्टी आयटी १ टक्के वाढला. निफ्टी मेटल निर्देशांकही वधारला आहे. तर दुसरीकडे निफ्टी फायनान्सियल सर्व्हिसेस, एफएमसीजी आणि रियल्टी निर्देशांक घसरले आहेत.
सेन्सेक्सवरील ३० पैकी २६ शेअर्स हिरव्या रंगात खुले झाले आहेत. यात इन्फोसिस, टाटा स्टील, टेक महिंद्रा, सन फार्मा, टीसीएस, एचसीएल टेक, टाटा मोटर्स, एचडीएफसी बँक शेअर्सचा समावेश आहे. तर अल्ट्राटेक सिमेंट, बजाज फायनान्स, बजाज फिनसर्व्ह, भारतीय एअरटेल या शेअर्समध्ये घसरण झाली आहे.
अमेरिकेच्या फेडरल कोर्टाने राष्ट्राध्यक्ष डोनाल्ड ट्रम्प यांना मोठा धक्का देत त्यांच्या प्रस्तावित लिबरेशन डे टॅरिफला स्थगिती दिली. या निर्णयानंतर अमेरिका आणि आशियाई बाजारात तेजी पसरली. भारतीय शेअर बाजाराने याचा मागोवा घेत तेजीत सुरुवात केली.
