Stock Market Opening Updates
इस्रायल आणि इराण यांच्यातील तणावाचा दबाव भारतीय शेअर बाजारात मंगळवारी (दि. १७) दिसून आला. सेन्सेक्स २१२ अंकांनी घसरून ८१,५८३ वर बंद झाला. तर निफ्टी ५० निर्देशांक ९३ अंकांच्या घसरणीसह २४,८५३ वर स्थिरावला. आजच्या सत्रात फायनान्सियल आणि ऑईल- गॅस कंपन्यांचे शेअर्स घसरले. तर आयटी शेअर्स तेजीत राहिले.
इस्रायल आणि इराण यांच्यातील संघर्ष, कच्च्या तेलाच्या दरातील वाढ आणि विदेशी गुंतवणूकदारांकडून गेल्या चार दिवसांपासून विक्री सुरु राहिल्याच्या पार्श्वभूमीवर शेअर बाजारात दबाव राहिला. तसेच याआधीच्या सत्रातील तेजीनंतर गुंतवणूकदारांनी प्रॉफिट बुकिंग केले. परिणामी, सेन्सेक्स- निफ्टी घसरले.
सेन्सेक्सवर सन फार्माचा शेअर्स २.१ टक्के घसरला. त्याचबरोबर इर्टनल, टाटा मोटर्स, बजाज फायनान्स, इंडसइंड बँक, बजाज फिनसर्व्ह, नेस्ले इंडिया, टाटा स्टील हे शेअर्स १ ते २ टक्क्यांपर्यंत घसरले. तर दुसरीकडे टेक महिंद्रा, इन्फोसिस हे शेअर्स प्रत्येकी १ टक्के वाढले. एशियन पेंट्स, टीसीएस, एनटीपीसी, मारुती, एचसीएल टेक हे शेअर्सही वधारुन बंद झाले.
निफ्टी ५० वर अदानी एंटरप्रायजेस, डॉ. रेड्डीज, टाटा मोटर्स हे शेअर्स टॉप लूजर्स ठरले. तर टेक महिंद्रा, इन्फोसिस, एशियन पेंट्स, मारुती हे शेअर्स टॉप गेनर्स राहिले.
क्षेत्रीय निर्देशांकातील निफ्टी फार्मा १.९ टक्के घसरला. अमेरिकेचे राष्ट्राध्यक्ष डोनाल्ड ट्रम्प यांनी फार्मा टॅरिफ लवकरच लागू होईल, असे संकेत दिल्यानंतर फार्मा शेअर्स गडगडले असल्याचे बाजारातील तज्ज्ञांचे म्हणणे आहे.
आयटी वगळता इतर क्षेत्रीय निर्देशांक लाल रंगात बंद झाले. मेटल निर्देशांक १ टक्के घसरला. ऑटो, कन्झ्यूमर ड्युराबेल्स, रियल्टी, ऑईल अँड गॅस, पीएसयू बँक हे प्रत्येकी ०.५ टक्के घसरले.
