Stock Market Bloodbath: भारतीय शेअर बाजारात आज मोठी घसरण पाहायला मिळाली. निफ्टीच्या वीकली एक्सपायरीच्या दिवशी बाजारात जोरदार विक्री झाली आणि प्रमुख निर्देशांक मोठ्या घसरणीसह बंद झाले. जागतिक तणाव, वाढलेले कच्च्या तेलाचे दर, पंतप्रधान नरेंद्र मोदींचं सलग दुसऱ्या दिवशीचं आवाहन आणि गुंतवणूकदारांमधील भीती यामुळे बाजारावर मोठा दबाव दिसून आला.
दिवसभराच्या व्यवहाराअखेर सेन्सेक्स तब्बल 1,456 अंकांनी घसरून 74,559 वर बंद झाला. तर निफ्टी 50 निर्देशांक 436 अंकांनी कोसळून 23,379 या पातळीवर आला. बँक निफ्टीमध्येही मोठी घसरण झाली आणि तो 884 अंकांनी खाली येत 53,555 वर बंद झाला.
बीएसईच्या 30 शेअर्सपैकी केवळ तीन शेअर्स वधारले. उर्वरित 27 शेअर्स घसरणीसह बंद झाले. अदानी पोर्ट्स, टीसीएस, टेक महिंद्रा आणि एचसीएल यांना सर्वाधिक नुकसान झाले. या तीव्र घसरणीमुळे आज गुंतवणूकदारांचे 11 लाख कोटी रुपयांचे नुकसान झाले, कारण बीएसईचे बाजार भांडवल 467 लाख कोटी रुपयांवरून 456 लाख कोटी रुपयांपर्यंत घसरले.
मोठ्या कंपन्यांसोबतच मिडकॅप आणि स्मॉलकॅप शेअर्समध्येही मोठी पडझड झाली. निफ्टी मिड सिलेक्ट निर्देशांक सुमारे 2.5 टक्क्यांनी घसरला, तर स्मॉलकॅप इंडेक्समध्ये 3 टक्क्यांहून अधिक घसरण झाली.
तज्ज्ञांच्या मते, मिडल ईस्टमधील वाढता तणाव, कच्च्या तेलाच्या सातत्याने वाढणाऱ्या किमती आणि जागतिक आर्थिक अनिश्चिततेमुळे बाजारात Risk-Off Sentiment दिसून आला. म्हणजेच, गुंतवणूकदारांनी जोखमीच्या गुंतवणुकीपासून दूर राहण्याचा पर्याय निवडला.
सेक्टोरल इंडेक्समध्ये सर्वाधिक दबाव रिअॅल्टी आणि IT क्षेत्रावर दिसून आला. रिअॅल्टी निर्देशांक जवळपास 4 टक्क्यांनी कोसळला. तर IT निर्देशांकात 3.7 टक्क्यांची घसरण झाली. कंझ्युमर ड्युरेबल क्षेत्र 3.5 टक्क्यांनी खाली आलं, तर ऑटो सेक्टरमध्ये 2.2 टक्क्यांची घसरण झाली. बहुतेक सर्व क्षेत्रं लाल रंगात बंद झाली, ज्यामुळे बाजारातील भीती स्पष्ट दिसून आली.
निफ्टी 50 मधील सर्वात मोठा फटका वित्तीय आणि IT कंपन्यांना बसला. Shriram Finance चा शेअर 4.5 टक्क्यांनी घसरला. Adani Ports and Special Economic Zone आणि Tech Mahindra मध्ये सुमारे 4.4 टक्क्यांची घसरण झाली. तर HCL Technologies चा शेअर 4.1 टक्क्यांनी खाली आला.
रिअॅल्टी क्षेत्रातही मोठी विक्री झाली. Anant Raj Limited जवळपास 6.9 टक्क्यांनी घसरला. Macrotech Developers मध्ये 5.6 टक्क्यांची घसरण झाली, तर Prestige Estates Projects आणि Godrej Properties यांनाही फटका बसला.
मोठ्या घसरणीतही काही तेल आणि गॅस कंपन्यांचे शेअर्स तेजीत राहिले. Oil and Natural Gas Corporation (ONGC) चा शेअर जवळपास 5 टक्क्यांनी वाढला. सरकारने कच्च्या तेलावरील रॉयल्टी दरात कपात जाहीर केल्याने तेल उत्पादक कंपन्यांना फायदा होण्याची अपेक्षा आहे. Oil India Limited चा शेअर 7.9 टक्क्यांनी वाढला. तर Hindustan Zinc मध्ये सुमारे 2 टक्क्यांची तेजी पाहायला मिळाली.
गुंतवणूक प्लॅटफॉर्म Groww च्या शेअरमध्ये जवळपास 5.5 टक्क्यांची घसरण झाली. मोठ्या ब्लॉक डील आणि सुरुवातीच्या गुंतवणूकदारांकडून हिस्सेदारी विक्रीच्या बातम्यांमुळे हा दबाव दिसून आला.
निकालांमुळे काही शेअर्समध्ये मोठी हालचाल दिसली. Butterfly Gandhimathi Appliances जवळपास 13.3 टक्क्यांनी वधारला, तर Aurionpro Solutions मध्ये 12.6 टक्क्यांची घसरण झाली.
तज्ज्ञांच्या मते, सध्याची घसरण ही केवळ तांत्रिक कारणांमुळे नसून जागतिक परिस्थिती, तेलाचे वाढते दर आणि आर्थिक अनिश्चिततेचा परिणाम आहे. त्यामुळे बाजारात पुढील काही दिवस अस्थिरता कायम राहू शकते. सोप्या भाषेत सांगायचं तर, मिडल ईस्टमधील संघर्ष आणि वाढत्या आर्थिक चिंतेचा थेट परिणाम आता दलाल स्ट्रीटवर दिसू लागला आहे.
