Stock Market Today: बुधवारी देशांतर्गत शेअर बाजाराची सलग चौथ्या दिवशी हिरव्या रंगात सुरुवात झाली. सकाळच्या व्यवहारात NIFTY 50 क्षणभर 26,000 च्या पुढे गेला, तर BSE Sensex सुमारे 80 अंकांनी वधारला. मात्र बँक निफ्टीमध्ये आजही घसरण झाली.
सकाळी साडे नऊच्या सुमारास सेन्सेक्स 84,300 च्या आसपास होता, तर निफ्टी जवळपास 26,000 च्या पातळीवर ट्रेड करत होता. ऑटो आणि कन्झम्पशन (ग्राहकोपयोगी वस्तू) क्षेत्रात खरेदी झाली, पण मिडकॅप आणि स्मॉलकॅप शेअर्समध्ये हलकी घसरण झाली आहे.
मंगळवारी अमेरिकन बाजारांत टेक शेअर्समध्ये नफावसुली झाली. मात्र डाओ निर्देशांकाने नवा लाइफ हाय गाठत सलग तिसऱ्या दिवशी तेजीसह बंद झाला. नॅस्डॅक मात्र जवळपास 150 अंकांनी घसरला. याचा परिणाम जागतिक बाजारांवर संमिश्र स्वरूपात दिसला, तर GIFT निफ्टी मजबूत राहिल्यामुळे भारतीय बाजाराला सुरुवातीला आधार मिळाला.
परदेशी संस्थागत गुंतवणूकदारांनी (FII) सलग तिसऱ्या दिवशी खरेदी करत बाजाराला सपोर्ट दिला. कॅश आणि फ्युचर्स मिळून सुमारे 800 कोटी रुपयांची निव्वळ खरेदी झाली. देशांतर्गत संस्थागत गुंतवणूकदारांनीही (DII) दुसऱ्या दिवशी बाजारात गुंतवणूक केली. त्यामुळे एकूण फ्लो सकारात्मक राहिला.
जागतिक बाजारात सोनं सुमारे 30 डॉलरने घसरलं, तर चांदीत जवळपास 2 टक्क्यांची घसरण झाली. देशांतर्गत बाजारातही सोनं आणि चांदी स्वस्त झाली. दुसरीकडे कच्चं तेल 69 डॉलरच्या आसपास स्थिर राहिलं असून, गुंतवणूकदारांची नजर आता अमेरिकेच्या इन्व्हेंटरी डेटावर आहे.
आज नॉन-रिटेल गुंतवणूकदारांसाठी Bharat Heavy Electricals Limited (BHEL) चा ऑफर फॉर सेल खुला होत आहे. सरकार कंपनीतील 5 टक्के हिस्सा विकणार असल्यामुळे शेअरमध्ये हालचाल दिसू शकते. दरम्यान, Tata Motors ला सुमारे 70 हजार कमर्शियल वाहनांची मोठी ऑर्डर मिळाली आहे. ही ऑर्डर कंपनीच्या व्यवसायासाठी महत्त्वाची मानली जात आहे.
डिसेंबर तिमाहीत Titan Company चे निकाल मजबूत राहिले. काही कंपन्यांचे निकाल अपेक्षेनुसार आले, तर काहींनी निराशा केली. आज निफ्टीमध्ये M&M कडे लक्ष राहणार आहे. वायदा बाजारात Ashok Leyland, Divi’s Lab, Max Financial आणि Patanjali यांच्या निकालांवर गुंतवणूकदारांचे लक्ष आहे.
