आरोग्य विमा दावा (Health Insurance Claim) करण्यासाठी 24 तास रुग्णालयात दाखल राहण्याची अट आता संपुष्टात आली आहे. अनेक विमा कंपन्या आता फक्त 2 तास रुग्णालयात दाखल झाल्यासही मेडिक्लेम देत आहेत. नवीन युगातील वैद्यकीय तंत्रज्ञानातील बदलांशी जुळवून घेण्यासाठी हा महत्त्वपूर्ण बदल केला जात आहे.
पूर्वी आरोग्य विम्याचा दावा करण्यासाठी रुग्णालयात किमान २४ तास दाखल राहणे बंधनकारक होते. तथापि, आता तसे होणार नाही, कारण अनेक विमा कंपन्या ही अट बाजूला सारून फक्त २ तासांसाठी रुग्णालयात दाखल झाल्यासही क्लेम करण्याची सुविधा देत आहेत.
CNBC TV18 च्या वृत्तानुसार, पॉलिसीबाजारमधील आरोग्य विम्याचे प्रमुख सिद्धार्थ सिंघल यांनी सांगितले की, "गेल्या दहा वर्षांत वैद्यकीय क्षेत्रातील प्रगतीने उपचार आणि शस्त्रक्रियेची पद्धत पूर्णपणे बदलली आहे. यामुळे रुग्णालयात थांबण्याचा कालावधीही कमी झाला आहे."
पूर्वी मोतीबिंदू शस्त्रक्रिया, केमोथेरपी किंवा अँजिओग्राफीसारख्या उपचारांसाठी रात्रभर रुग्णालयात थांबावे लागत होते. मात्र, आज वैद्यकीय तंत्रज्ञान इतके प्रगत झाले आहे की हे सर्व उपचार काही तासांतच पूर्ण होतात. हे लक्षात घेऊन, अनेक विमा कंपन्या त्यांच्या पॉलिसीमध्ये २ तासांच्या हॉस्पिटलायझेशनलाही कव्हर करत आहेत. केवळ रुग्णालयात रात्रभर न थांबल्यामुळे कोणत्याही पॉलिसीधारकाचा क्लेम नाकारला जाऊ नये, हे सुनिश्चित करणे हा यामागील उद्देश आहे.
या बदलाचा स्वीकार करणाऱ्या कंपन्यांमध्ये आयसीआयसीआय लोम्बार्ड (ICICI Lombard), केअर हेल्थ इन्शुरन्स (Care Health Insurance) आणि निवा बुपा (Niva Bupa) यांचा समावेश आहे.
ICICI Lombard Elevate Plan: या प्लॅनमध्ये ३० वर्षांच्या धूम्रपान न करणाऱ्या व्यक्तीसाठी वार्षिक ९,१९५ रुपयांच्या प्रीमियमवर १० लाख रुपयांपर्यंतचे कव्हरेज मिळत आहे.
Care-Supreme Plan: या प्लॅनसाठी वार्षिक प्रीमियम १२,७९० रुपयांपासून सुरू होत आहे.
Niva Bupa Health ReAssure: या प्लॅनसाठी प्रीमियम प्रति वर्ष १४,१९९ रुपयांपासून सुरू होत आहे.
आरोग्य विमा पॉलिसीमधील हा बदल आधुनिक वैद्यकीय उपचारांच्या सोयीनुसार असून तो ग्राहकांसाठी अत्यंत फायदेशीर ठरणार आहे.
