Bigg Boss Marathi 4 : माणूस हाय मी; बिग बॉस मराठीचे स्पर्धक किरण मानेंची पोस्ट व्हायरल

गावाकडचा गडी हाय. शेतकरी कुटुंबातला. रानात फिरलेला, ढेकळं तुडवलेला. नदीत, विहिरीत पोहलेला. एका गोष्टीवर कंट्रोल ठेवायचा जिवापाड प्रयत्न करावा लागनारंय दोस्तांनो. 'शिवी' ! 'शिवी' हा आमच्या बोलीतला अविभाज्य भाग हाय. त्या शिव्यांचा अर्थ नस्तो डोक्यात. एक एक्सप्रेशन म्हनून ती बाहेर येती एवढंच. आवो आमी तर लै छोटी मान्सं, आमच्या पहाडासारख्या तुकोबारायाच्या अभंगातबी तुमाला शिव्या सापडत्याल. निव्वळ मनातली भडास व्यक्त करन्याचं साधन म्हनून शिवी येती तोंडात. पन त्याचा तिथं 'इश्यू' हुईल.. माझ्याविरूद्ध शस्त्र म्हनून वापर हुईल, हे म्हायतीय मला. कारन मी बी लै शिवराळ हाय. भांडताना मला त्या सवयीवर लगाम घालायला लागनार. ते करीन.

माझ्या भावांनो आनि बहिनींनो, मी तुमचं मनोरंजन करन्यात कनभरबी कमी पडनार नाय. माझ्याकडनं चुका झाल्या तर त्या पोटात घ्याल तुमी हे बी म्हायतीय मला. मला एक महत्त्वाचं सांगावंसं वाटतंय. मी तुकोबारायांवर कायम लिहीत असतो. तुकोबा माझ्या श्वासात हाय. मी गौतम बुद्धांवर व्याख्यान देतो. छ. शिवराय, छ. शंभूराजे यांच्यावर व्याख्यानं देतो. महाराष्ट्रातल्या गांवोगांवी जाऊन महात्मा फुले, लोकराजा शाहू महाराज, भारतरत्न डाॅ. बाबासाहेब आंबेडकर यांच्या विचारांची पेरणी करतो. या सगळ्या महामानवांचे विचार माझ्या रक्तात हायेत. पन एक लक्षात ठेवा, सामान्य मानूस ज्या चुका करतो, त्या माझ्याकडनं बी होत्यात. मी आदर्श असल्याचा मुखवटा घालून नाय खेळनार. अभिनेता, सेलिब्रिटी म्हनून 'बिग बाॅस'सारख्या शो मध्ये जाताना मी केवळ एक त्या शो चा खेळाडू म्हनून खेळीन. "बाहेर व्याख्यानांत महामानवांवर बोलतो आणि शो मध्ये बघा कसा भांडतोय." असा गोंधळ करून घेऊ नका. मी बिग बाॅसच्या घरात केवळ या शो च्या 'फाॅरमॅट'चं पालन करून खेळनारा एक खेळाडू असेन. खेळाडू, एक अभिनेता म्हनूनच माझ्याकडं बघा आणि शोचा आनंद घ्या.

मी ग्रामीण, शेतकरी, कष्टकरी, वारकरी कुटुंबातला हाय. संवेदनशील, विवेकी विचारांचा शहरी वर्गही माझ्या लै जवळचा हाय. तिथं मी जेवढे दिवस असेन तेवढे दिवस तुम्ही सगळ्यांनी माझ्या 'परफाॅर्मन्स'चा आनंद घ्यावा, तुमचा रोजचा एक तास माझ्यामुळं सुखकर व्हावा ही माझी इच्छा हाय.