गुवाहाटी; वृत्तसंस्था : तामूलपूर, स्पोर्टस् कॉम्प्लेक्स, गुवाहाटी (आसाम) येथे संपन्न झालेल्या चौथ्या आशियाई खो-खो स्पर्धेत भारताच्या पुरुष व महिला संघांनी नेपाळच्या संघांवर मात करताना जागतिक स्तरावर विजयाची गुढी उभारली. या स्पर्धेचे अंतिम सामने गुरुवारी (दि. 23) दुपारी झाले. मॅटवर झालेल्या या स्पर्धेत महिला गटामध्ये नेपाळ संघाने स्पर्धेत चांगली कामगिरी नोंदवली होती; परंतु भारताच्या महिला संघामध्ये अनुभवी आणि दर्जेदार खेळाडूंचा समावेश असल्यामुळे अंतिम सामना एकतर्फी झाला. (Asian Kho Kho Championship 2023)
भारताने नेपाळचा 49-16 असा एक डाव 33 गुणांनी धुव्वा उडवत पराभव केला. विजयी भारतीय संघाकडून गौरी शिंदे, दीपिका चौधरी, मिनू, प्रियांका इंगळे, अपेक्षा सुतार यांनी चांगला खेळ करत विजयात जोरदार कामगिरी केली. नेपाळतर्फे बिनू तानंगा, पूजा ओद वगळता अन्य खेळाडूंना चांगली कामगिरी नोंदवता आली नाही. (Asian Kho Kho Championship 2023)
पुरुषांच्या अंतिम सामन्यात भारताने नेपाळचा 38-32 असा एक डाव 6 गुणांनी पराभव केला. भारताच्या धारदार आक्रमणापुढे नेपाळच्या संरक्षकांची फळी टिकाव धरू शकली नाही. भारतीय खेळाडूंनी सूर मारून व खुंटात गडी बाद करण्याच्या कौशल्याचा चांगला फायदा करून घेतला. कर्णधार अक्षय भांगरे, अनिकेत पोटे, अक्षय गणपुले, अमित यांनी बहारदार खेळ करत भारतीय संघाच्या विजयात मोलाची भूमिका बजावली. नेपाळतर्फे धर्मा, बिकामा, बिश्वा यांनी चांगला खेळ केला.
स्पर्धेचे तृतीय क्रमांकाचे परितोषिक महिला आणि पुरुष संघांमध्ये उपांत्य पराभूत श्रीलंका व बांगला देश या दोन संघांना देण्यात आले आहे. स्पर्धेचे पारितोषिक वितरण आसामचे राज्यपाल गुलाबचंद कटेरिया, प्रमोद बोरा, खो-खो फेडरेशन अध्यक्ष सुधांशू मित्तल, सचिव एम. त्यागी, स्पर्धा समिती सदस्य व सहसचिव डॉ. चंद्रजित जाधव, सचिन गोडबोले, महाराष्ट्राचे सचिव अॅड. गोविंद शर्मा, राणी तिवारी यांच्यासह आसाममधील खो-खो असोसिएशनचे पदाधिकारी उपस्थित होते.
हेही वाचा;
