पुढारी ऑनलाईन डेस्क : जगातील सर्वात श्रीमंत व्यक्ती आणि अमेरिकन इलेक्ट्रिक कार कंपनी टेस्लाचे सीईओ एलॉन मस्क यांनी धक्कादायक बाब समोर आणली आहे. त्यांनी एक ट्विट करत ट्विटर विकत घेण्यासंदर्भातील डीलबाबत खुलासा केला आहे. त्यांनी ट्विटर विकत घेण्याची डील अद्याप होल्डवर असल्याचे जाहीर केले आहे.
मस्क यांनी आज सांगितले की, ट्विटर विकत घेण्याचा त्यांचा ४४ अब्ज डॉलर्सची डील सध्यातरी थांबवण्यात आली आहे. स्पॅम आणि बनावट खात्यांच्या मुद्द्यावर हा व्यवहार तात्पुरता थांबवण्यात आला आहे. मस्क म्हणतात की ट्विटरवर स्पॅम किंवा बनावट खाती खरोखर ५ टक्क्यांपेक्षा कमी आहेत? या गणनेचा तपशील अद्याप स्पष्ट झालेला नाही. अशा परिस्थितीत हा व्यवहार काही काळासाठी स्थगित करण्यात आल्याचे त्यांनी ट्विटमध्ये म्हटले आहे.
ट्विटरच्या मते, २०२२ च्या पहिल्या तिमाहीत, मायक्रोब्लॉगिंग प्लॅटफॉर्मवरील दैनिक सक्रिय युजर्स पैकी ५ टक्के पेक्षा कमी बनावट किंवा स्पॅम खाती आहेत. ट्विटरचे सुमारे २२९ दशलक्ष युजर्स वापरकर्ते आहेत. गेल्या महिन्यात एप्रिलमध्ये टेस्लाचे सीईओ एलॉन मस्क यांनी ट्विटर इंकला ४४ अब्ज डॉलर्सला (३.३७ लाख कोटी रुपये) खरेदी केले.
सोशल मीडिया कंपनी ट्विटरच्या शेअर्समध्ये २० टक्के घसरण झाली आहे. ट्विटरने या प्रकरणावर त्वरित प्रतिक्रिया दिलेली नाही. कंपनीने महिन्याच्या सुरुवातीला गणना केली होती की पहिल्या तिमाहीत मॉनेटाईज केलेल्या सक्रिय युझर्सपैकी ५ टक्केपेक्षा कमी खोटी किंवा स्पॅम खाती आहेत.
कंपनीने असेही म्हटले आहे की जोपर्यंत एलॉन मस्क यांच्यासोबतचा करार पूर्ण होत नाही तोपर्यंत जाहिरातदार ट्विटरवर खर्च करणे सुरू ठेवतील की नाही यासह अनेक आव्हानांना सामोरे जावे लागेल.
मस्क (Elon Musk) यांनी ट्विटरची खरेदी (Musk Twitter Deal) केल्यानंतर सर्व काही सुरळीत पार पडण्याऐवजी त्यांच्या अडचणीत अधिकच वाढ होताना दिसत आहे. ट्वीटर खरेदीनंतर टेस्लाचे शेअर्स मोठ्या प्रमाणावर घसरल्याने मस्क यांना मोठे नुकसान सोसावे लागले होते. तसेच ट्वीटर खरेदी रोखण्यासाठी अनेकांकडून प्रयत्न केले जात आहे.
फ्लोरिडा पेंशन फंड यांनी डेलावेअर चान्सरी न्यायालयात ट्वीटरची खरेदी रोखण्यासाठी एलन मस्क आणि ट्वीटर विरोधात याचिका दाखल केल्याच्या बातमी काही दिवसांपूर्वी समोर आली होती. त्याततच आता स्वत: मस्क यांनी ट्विटर डील होल्डवरच असल्याचे म्हटले आहे.
मस्क यांनी ४४ अब्ज डॉलर्सला ट्विटरची खरेदी केली. या व्यवहारानंतर त्यांनी सांगितले की, आपण फंडची उभारणी करत आहोत. सिकोया कॅपिटल फंडने ८० कोटी डॉलर, वाय कॅपिटलने ७० कोटी डॉलरची उभारणी केली. ओरॅकलचे सह-संस्थापक लॅरी एलिसन यांनी १ अब्ज डॉलर्सची गुंतवणूक करण्याचे मान्य केले होते.
हे ही वाचलं का ?