पुणे : पुढारी वृत्तसेवा
घरफोडी करणाऱ्या चोरट्यांनी पोलिसांवर हल्ला केला. ही घटना मार्केट यार्ड परिसरात बुधवारी पहाटे चारच्या सुमारास घडली. पोलिसांनी चोरट्यांना थांबण्याचा इशारा केल्यानंतर त्यांनी पोलिसांच्या दिशेने दगडफेक करीत कोयता ते फेकून मारले. यावेळी मार्केट यार्ड पोलीस ठाण्याच्या पोलिसांनी स्वसंरक्षणात हवेत गोळीबार केला. सुदैवाने या घटनेत कोणीही जखमी झालेले नाही. सिटी प्राईड चित्रपटगृहाच्या मागे सोनिया अपार्टमेंट या ठिकाणी ही घटना घडली आहे.
मार्केट यार्ड पोलिसांचे पथक गस्तीवर असताना मुख्य नियंत्रण कक्षातून घरफोडी सुरू असल्याचा कॉल मिळाला होता. त्यानंतर मार्केट पोलिस घटनास्थळी पोहोचले. पोलिस आल्याचे पाहून चोरट्यांनी वरूनच दगडफेक करण्यास सुरुवात केली. त्यानंतर कोयता फेकून मारले. अचानक झालेल्या हल्ल्यामुळे पोलिसांनी हवेत गोळीबार केल्याची माहिती आहे. त्यानंतर चोरट्यांनी तेथून पळ काढला. घटनेची माहिती मिळताच वरिष्ठ अधिकाऱ्यांनी घटनास्थळी भेट दिली असून चोरट्यांचा शोध सुरू केला आहे.
मार्केटयार्ड परिसरातील सिटी प्राईड चित्रपटगृहाच्या पाठीमागे जावळकर कॉलनी आहे. या कॉलनी मध्ये पहाटेच्या सुमारास चार ते पाच चोरटे याठिकाणी असलेल्या पाच मजली इमारतीमध्ये शिरले. त्यांनी तिसऱ्या मजल्यावरील फ्लॅट फोडण्याचा प्रयत्न केला. त्यावेळी आवाज झाल्यामुळे शेजारचे नागरिक जागे झाले. त्यांनी बाहेर येण्याचा प्रयत्न केला. पण चोरट्यांनी शेजारील फ्लॅटला बाहेरून कड्या लावल्या होत्या. त्यामुळे नागरिकांनी नियंत्रण कक्षाला घरफोडीची माहिती दिली.
सोसायटीत चोरटे घुसल्याची माहिती मिळताच मार्केट यार्ड पोलिस ठाण्याचे बीट मार्शल व रात्र गस्तीवर असलेले पोलिस तात्काळ घटनास्थळी दाखल झाले. पोलिसांना पाहून चोरटे पळून गेले आणि जात असताना त्यांनी सुरक्षारक्षक आणि पोलिसांवर दगडफेक केली, तसेच घातक शस्त्राने हल्ला करण्याचा प्रयत्न केला. त्यावेळी पोलिसांनी हवेत गोळीबार केला. अंधाराचा फायदा घेऊन चोरटे पसार झाले. याप्रकरणी मार्केट यार्ड पोलिस ठाण्यात गुन्हा दाखल करण्याचे काम सुरू आहे.