Don Bradman’s 3-Over Century: क्रिकेटच्या इतिहासात अनेक विक्रम झाले आहेत. काही विक्रम इतके भव्य असतात की त्यावर विश्वास ठेवणंही कठीण होतं. पण जगातील महान फलंदाज डॉन ब्रॅडमन यांनी असा एक विक्रम केला होता, जो आजही जवळपास अशक्य मानला जातो.
फक्त तीन ओव्हर्समध्ये शतक झळकावण्याचा पराक्रम त्यांनी 1931 मध्ये करून दाखवला होता. आजच्या टी-20 क्रिकेटमध्येही अनेक फलंदाजांना शतकासाठी संघर्ष करावा लागतो, तिथे ब्रॅडमन यांनी तब्बल 22 चेंडूंमध्ये शतक ठोकून क्रिकेट विश्व हादरवलं होतं.
2 नोव्हेंबर 1931 रोजी खेळल्या गेलेल्या एका क्लब सामन्यात हा ऐतिहासिक पराक्रम घडला. ब्लॅकहीथ संघाकडून खेळताना ब्रॅडमन यांनी लिथगो संघाविरुद्ध धडाकेबाज फलंदाजी केली.
त्या काळात एका ओव्हरमध्ये 6 नव्हे तर 8 चेंडू असायचे. या सामन्यात ब्रॅडमन यांनी सुरुवातीच्या तीन ओव्हर्समध्येच शतक पूर्ण केलं.
पहिल्या ओव्हरमध्ये त्यांनी 33 धावा केल्या. दुसऱ्या ओव्हरमध्ये तब्बल 40 धावा ठोकल्या आणि तिसऱ्या ओव्हरमध्ये आणखी 29 धावा काढल्या. अशा प्रकारे अवघ्या 22 चेंडूंमध्ये त्यांनी शतक पूर्ण केलं.
लिथगो संघाचा गोलंदाज विल ब्लॅक पहिला ओव्हर टाकण्यासाठी आला. ब्रॅडमन यांनी त्याच्या गोलंदाजीवर तुफानी हल्ला चढवत 3 षटकार आणि 3 चौकारांच्या मदतीने 33 धावा केल्या.
दुसऱ्या ओव्हरमध्ये हौरी बेकर गोलंदाजीसाठी आला. मात्र त्याची अवस्था आणखी बिकट झाली. ब्रॅडमन यांनी या ओव्हरमध्ये 4 षटकार आणि 4 चौकार ठोकत तब्बल 40 धावा चोपल्या.
तिसऱ्या ओव्हरमध्ये पुन्हा विल ब्लॅक गोलंदाजीला आला, पण ब्रॅडमन यांनी त्यालाही सोडलं नाही. या ओव्हरमध्ये त्यांनी 29 धावा केल्या.
या सामन्यात ब्रॅडमन यांनी केवळ शतकच झळकावलं नाही, तर तब्बल 256 धावांची खेळी केली. त्यांच्या या डावात 29 चौकार आणि 14 षटकारांचा समावेश होता. त्यांचा साथीदार वेन्डेल बिल यांनी 68 धावा केल्या. ब्लॅकहीथ संघाने प्रथम फलंदाजी करत 357 धावांचा डोंगर उभारला. प्रत्युत्तरात लिथगो संघ 228 धावांवर गारद झाला आणि ब्लॅकहीथ संघाने हा सामना 129 धावांनी जिंकला.
आजच्या आक्रमक क्रिकेटच्या युगातही 22 चेंडूंमध्ये शतक झळकावणं जवळपास अशक्य मानलं जातं. त्यामुळे ब्रॅडमन यांचा हा विक्रम आजही क्रिकेट इतिहासात सर्वात अविश्वसनीय विक्रम मानला जातो.