पिंपरी: वाढत्या शहरासोबत विस्तारत चाललेली पोलिसांची जबाबदारी पेलण्यासाठी पिंपरी-चिंचवड पोलिस दलाला आता आधुनिक तंत्रज्ञान आणि भक्कम पायाभूत सुविधांचा बूस्टर डोस मिळणार आहे. स्वतंत्र मुख्यालय, सुसज्ज पोलिस संकुल, अत्याधुनिक वाहतूक नियंत्रण यंत्रणा आणि गस्तीसाठी नवीन वाहनांच्या माध्यमातून पोलिस दलाची ताकद वाढविण्यात येणार आहे. मुख्यमंत्री देवेंद्र फडणवीस यांच्या हस्ते मंगळवारी (दि. ३) या प्रकल्पांचा शुभारंभ होणार असून, ६५ नवीन वाहने, ३५० बॉडी वॉर्न कॅमेरे आणि चार ड्रोन पोलिसांच्या ताफ्यात दाखल होणार आहेत.
आकुर्डी प्राधिकरणातील ग. दि. माडगुळकर नाट्यगृहात दुपारी दीड वाजता हा कार्यक्रम होणार आहे. केंद्रीय राज्यमंत्री मुरलीधर मोहोळ, उपमुख्यमंत्री एकनाथ शिंदे, सुनेत्रा पवार, महसूलमंत्री चंद्रशेखर बावनकुळे, उच्च व तंत्रशिक्षणमंत्री चंद्रकांत पाटील, कृषिमंत्री दत्तात्रय भरणे, विधानसभा उपाध्यक्ष अण्णा बनसोडे, राज्यमंत्री माधुरी मिसाळ यांची प्रमुख उपस्थिती राहणार आहे. पोलिस महासंचालक सदानंद दाते विशेष अतिथी म्हणून उपस्थित असतील.
पोलिस आयुक्तालयाच्या स्वतंत्र मुख्यालयासाठी ताथवडे येथे मंजूर झालेल्या जागेच्या सातबारा उताऱ्याचे औपचारिक हस्तांतरण मुख्यमंत्र्यांच्या हस्ते करण्यात येणार आहे. त्यामुळे स्वतंत्र मुख्यालयाच्या उभारणीच्या प्रक्रियेला गती मिळणार आहे. याचवेळी पिंपरी येथे उभारण्यात येणाऱ्या पोलिस संकुलाचे भूमिपूजन होणार आहे. या संकुलात पिंपरी पोलिस ठाणे, परिमंडळ एकच्या पोलिस उपआयुक्तांचे कार्यालय, अमली पदार्थविरोधी टास्क फोर्सचे विभागीय कार्यालय आणि पोलिस अधिकारी, कर्मचाऱ्यांसाठी २०० शासकीय निवासस्थाने असणार आहेत.
शहरातील वाहतुकीला शिस्त लावण्यासाठी आणि सार्वजनिक सुरक्षितता अधिक मजबूत करण्यासाठी सीसीटीव्ही व एकात्मिक वाहतूक व्यवस्थापन प्रणाली (आयटीएमएस) प्रकल्पाचा शुभारंभ करण्यात येणार आहे. या प्रणालीमुळे वाहतुकीवरील देखरेख आणि नियमभंग करणाऱ्यांवरील कारवाई अधिक प्रभावी होण्यास मदत होणार आहे. बॉडी वॉर्न कॅमेऱ्यांमुळे पोलिसांच्या प्रत्यक्ष कारवाईचे चित्रीकरण होणार असून, ड्रोनच्या माध्यमातून गर्दीची ठिकाणे, मिरवणुका आणि बंदोबस्तावर हवाई नजर ठेवता येणार आहे. नवीन वाहनांमुळे पोलिसांची गस्त आणि आपत्कालीन परिस्थितीतील प्रतिसादक्षमता वाढण्यास मदत होणार आहे.
अमली पदार्थांच्या विळख्यातून तरुणाईला दूर ठेवण्यासाठी ‘नशामुक्त पिंपरी-चिंचवड’ अभियानांतर्गत ऑनलाइन कार्यक्रम आयोजित करण्यात येणार आहे. यामध्ये विद्यार्थी आणि नागरिकांशी थेट संवाद साधून अमली पदार्थांच्या दुष्परिणामांबाबत जनजागृती करण्यात येणार आहे. पोलिस आयुक्त विनय कुमार चौबे यांच्या वतीने या कार्यक्रमाचे आयोजन करण्यात आले आहे.