पिंपरी: जलतरण तलावाच्या शुल्कवाढीमुळे खेळाडू नाराज

पिंपरी (पुणे), पुढारी वृत्तसेवा: पिंपरी-चिंचवड महापालिकेने सार्वजनिक जलतरण तलावाच्या शुल्कदरात दुप्पटीने वाढ केली आहे. केवळ 45 मिनिटांच्या एक बँचचे तिकीट 10 रुपयांऐवजी 20 रुपये केले आहे. तसेच, पासचे दरही अव्वाच्या सव्वा वाढले आहेत. त्यामुळे शहरातील खेळाडू व नागरिक नाराजी व्यक्त करीत आहेत.

पालिकेच्या तलावावर अनेक खेळाडू तसेच, नागरिक पोहण्याच्या सरावासाठी येतात. सध्याचे दर माफक असल्याने खेळाडू व नागरिकांना ते परवडतात. मात्र, या दरात अचानक वाढ करण्यात आली आहे. तिकीट दर दहावरून वीस रुपये केला आहे. त्यात 45 मिनिटेही पोहता येत नाही. तर, मासिक, त्रैमासिक, सहामाही व वार्षिक पासमध्ये दुप्पटीने वाढ करण्यात आली आहे. त्यामुळे खेळाडूंसह नागरिकांवर आर्थिक ताण पडणार आहे.

परिणामी, सराव करण्यास मर्यादा पडणार आहेत. सरावच बंद केल्याने किंवा त्यात खंड पडल्याने खेळाडू तयार होण्यास अडथळा निर्माण होणार आहे. तसेच, पोहण्याचा सराव बंद केल्याने अनेकांना शारीरिक लाभ मिळणार नाही. ही दरवाढ पालिकेने मागे घ्यावी, अशी मागणी भारतीय रिपब्लिकन मायनॉरिटीज फेडरेशनचे अध्यक्ष फिरोज खान यांनी आयुक्त शेखर सिंह यांच्याकडे केली आहे.